मराठा को-ऑपरेटिव्ह बँक लिमिटेड बेळगावतर्फे येत्या शनिवार दि. 23 जुलै रोजी आयोजित बँकेच्या भागधारकांच्या गुणवंत मुला -मुलींच्या सत्कार समारंभास प्रमुख पाहुणे म्हणून जिल्हा पोलीस प्रमुख (एसपी) डॉ संजीव पाटील यांना निमंत्रित करण्यात आले आहे.
मराठा को-ऑप. बँकेचे चेअरमन दिगंबर पवार यांच्या नेतृत्वाखाली बँकेच्या संचालकांच्या शिष्टमंडळाने आज मंगळवारी जिल्हा पोलीस प्रमुख कार्यालयात जाऊन एसपी संजीव पाटील यांची भेट घेतली. या सर्वांनी सर्वप्रथम जिल्हा पोलीस प्रमुखपदी नियुक्ती झाल्याबद्दल संजीव पाटील यांचे अभिनंदन करून शुभेच्छा दिल्या.
यावेळी चेअरमन दिगंबर पवार यांनी जिल्हा पोलीस प्रमुख पाटील यांना पुष्पगुच्छ प्रदान केला. त्यानंतर त्यांना मराठा बँकेतर्फे येत्या शनिवारी आयोजित केल्या जाणाऱ्या गुणी विद्यार्थ्यांच्या सत्कार समारंभासाठी प्रमुख पाहुणे म्हणून उपस्थित राहण्याचे रितसर निमंत्रण देण्यात आले. एसपी संजीव पाटील यांनी देखील निमंत्रणाचा स्वीकार करून समारंभास उपस्थित राहण्याचे आश्वासन दिले आहे.
मराठा बँकेतर्फे येथे शनिवार दि. 23 जुलै रोजी दुपारी 3:30 वाजता बँकेच्या छ. शिवाजी महाराज सभागृहामध्ये भागधारकांच्या गुणवंत मुला -मुलींचा सत्कार समारंभ आयोजित करण्यात आला आहे. याप्रसंगी विद्यार्थी विद्यार्थिनींना करियरवर मार्गदर्शन करण्यासाठी मान्यवर मंडळींना निमंत्रित केले जाणार आहे.
जिल्हा पोलीस प्रमुखांच्या आजच्या भेटीप्रसंगी मराठा बँकेचे चेअरमन दिगंबर पवार यांच्यासह माजी चेअरमन बाळासाहेब काकतकर, संचालक शेखर हंडे, विनोद हंगिरगेकर, सामाजिक कार्यकर्ते विकास कलघटगी आदी उपस्थित होते. मराठा बँकेच्या संचालकांची जिल्हा पोलीस प्रमुखांशी भेट घडवून आणण्यात विकास कलघटगी यांनी पुढाकार घेतला होता.
