बेळगाव शहरातील शाळा महाविद्यालयांमधील भरमसाठ शैक्षणिक शुल्क आणि डोनेशनच्या विरोधात अखिल भारतीय विद्यार्थी परिषदेतर्फे आज गुरुवारी सकाळी राणी कित्तूर चन्नम्मा सर्कल येथे जोरदार निदर्शने करून जिल्हाधिकाऱ्यांना निवेदन सादर करण्यात आले.
शहरातील बहुतांश खाजगी शाळा आणि महाविद्यालयांमध्ये सध्या अव्वाच्यासव्वा शैक्षणिक शुल्क आकारणी केली जात आहे. त्याचप्रमाणे या शैक्षणिक संस्थांमधील प्रवेशासाठी भरमसाठ देणगी म्हणजे डोनेशनची मागणी केली जात आहे. ज्या देशातील शैक्षणिक व्यवस्था उत्तम असते त्या देशाचा निश्चितपणे उद्धार होतो हे लक्षात न घेता बेळगावात शिक्षणाचा बाजार मांडण्यात आला असल्याचा आरोप करत अखिल भारतीय विद्यार्थी परिषदेतर्फे आज गुरुवारी शहरात आंदोलन छेडण्यात आले.
कित्तूर चन्नम्मा सर्कल येथे मोठ्या संख्येने जमा झालेल्या अभाविपच्या पदाधिकारी व कार्यकर्त्यांनी अवास्तव शैक्षणिक फी आणि डोनेशन वसुलीच्या निषेधार्थ जोरदार निदर्शने केली. बेळगाव शहर परिसरातील विविध शैक्षणिक संस्थांचे विद्यार्थी -विद्यार्थिनी मोठ्या संख्येने या आंदोलनात सहभागी झाले होते. हातात झेंडे आणि बॅनर घेऊन निदर्शने करणारे हे विद्यार्थी सार्‍यांचे लक्ष वेधून घेत होते
याप्रसंगी प्रसारमाध्यमांशी बोलताना अभाविपचे पदाधिकारी व कार्यकर्ते म्हणाले की, खाजगी शाळा-महाविद्यालयांमध्ये अव्वाच्या सव्वा शैक्षणिक फी आणि डोनेशन तर आकारले जातेच शिवाय महाविद्यालयीन स्तरावर सीईटी, नीट आणि जेईई इंटिग्रेटेड कॉचींगच्या नावाने पैसे उकळले जात आहेत. सरकारच्या नियमानुसार खाजगी अनुदानित शाळांमध्ये सरकारने ठरवून दिलेल्या शैक्षणिक शुल्क व्यतिरिक्त जादा शुल्क आकारता येत नाही.
तथापि सरकारचा आदेश पायदळी तुडवून खाजगी अनुदानित महाविद्यालयांमधून विद्यार्थी आणि पर्यायाने पालकांची लूट केली जात आहे असे सांगून याकडे सरकारने गांभीर्याने लक्ष द्यावे आणि सदर प्रकाराला आळा घालणारा आदेश तात्काळ जारी करावा अन्यथा अभाविप यापेक्षा अधिक उग्र आंदोलन छेडेल, असा इशारा अभाविप पदाधिकारी व कार्यकर्त्यांनी यावेळी दिला.
