विद्यार्थिनीशी लैंगिक संबंध ठेवून तिचे अश्लील फोटो व्हायरल करणाऱ्या शिक्षकाला ग्रामस्थांनी चांगलाच चोप देऊन धुलाई केल्याची घटना सौंदत्ती तालुक्यातील यक्कुंडी या गावामध्ये घडली.
यक्कुंडी (ता. सौंदत्ती, जि. बेळगाव) गावातील माध्यमिक शाळेच्या शारीरिक शिक्षक महेश शिवलिंगप्पा बिरादार याने शाळेतील एका विद्यार्थिनीला विवाहाचे आमिष दाखवून तिच्याशी शारीरिक संबंध ठेवल्याचा आरोप आहे.
त्याने त्या मुली सोबत शारीरिक संबंध ठेवतानाचे व्हिडिओ आपल्या मोबाईलवर चित्रीत केले होते. शालेय शिक्षण पूर्ण झाल्यानंतर त्या युवतीचे लग्न ठरले. ते लग्न मोडण्यासाठी महेश बिरादार या शिक्षकाने व्हिडिओ एडिट करून आपल्या चेहऱ्या ऐवजी दुसरा चेहरा वापरून अश्लील फोटो व्हाट्सअपवर व्हायरल केले.
हे फोटो व्हायरल होताच संतप्त ग्रामस्थांनी शाळेत जाऊन क्रीडा शिक्षक असलेल्या महेश बिरादार याला चांगलाच चोप दिला.
शाळेतील मास्तरांची ग्रामस्थांनी धुलाई करतानाचा व्हिडिओ आता सोशल मीडियावर व्हायरल झाला आहे. महेश बिरादार हा शारीरिक शिक्षक मूळचा विजापूर जिल्ह्यातील देवरहिप्परगी तालुक्यातील बैरवाड गावचा रहिवासी आहे.
याप्रकरणी त्याच्याविरोधात सौदती पोलीस ठाण्यात गुन्हा नोंदविण्यात आला आहे. गुरू-शिष्याचे नाते पवित्र मानले जाते, मात्र आपल्याच विद्यार्थिनीशी शिक्षकाने शारीरिक संबंध ठेवण्याच्या या निंद्य प्रकाराचा सर्वत्र निषेध केला जात आहे.
