उत्कृष्ट गोलंदाजी आणि फलंदाजीच्या जोरावर सुपर एक्सप्रेस अर्जुन स्पोर्ट्स संघाने प्रतिस्पर्धी साईराज हुबळी टायगर्स संघाला 3 गडी राखून पराभूत करत दीपक नार्वेकर पुरस्कृत आणि बोर्ड ऑफ पेरेंट्स फाॅर क्रिकेट इन बेळगांवतर्फे आयोजित 16 वर्षाखालील बीपीसी चषक साखळी (लीग) क्रिकेट स्पर्धेचे अजिंक्यपद पटकाविले.
कॅम्प येथील युनियन जिमखाना मैदानावर आज बुधवारी झालेल्या स्पर्धेच्या अंतिम सामन्यात नाणेफेक जिंकून प्रथम फलंदाजी करताना साईराज हुबळी टायगर संघाने मर्यादित पंचवीस षटकात 9 गडी बाद 144 धावा काढल्या. प्रत्युत्तरादाखल सुपर एक्सप्रेस अर्जुन स्पोर्ट्स संघाने 24.3 षटकांत 7 गडी बाद 145 धावा काढताना 3 गडी राखून सामना खिशात टाकला.
या सामन्यातील सामनावीर पुरस्काराचा मानकरी सुपर एक्सप्रेस संघाचा ध्रुव देसाई हा ठरला. त्याने 6 चौकारांसह 54 चेंडूत अर्धशतकासह 58 धावा झळकाविलेल्या. अंतिम सामन्यासह स्पर्धेतील सामन्यांचे धावते समालोचन प्रमोद जपे, अरिफ बाळेकुंद्री, चैतन्य हलगेकर आणि अफान गंगवाले यांनी केले. स्कोररची भूमिका शिवानंद पाटील याने पार पाडली.
अंतिम सामन्यानंतर आयोजित बक्षीस वितरण समारंभास प्रमुख पाहुणे म्हणून कॅन्टोन्मेंट बोर्डचे मुख्य कार्यकारी अधिकारी बर्चस्वा, स्पर्धेचे पुरस्कर्ते दीपक नार्वेकर प्रकाश पाटील प्रणय शेट्टी आणि विठ्ठल गवस उपस्थित होते. या मान्यवरांच्या हस्ते विजेत्या आणि उपविजेत्या संघांना करंडकासह आकर्षक बक्षिसे, तसेच वैयक्तिक पारितोषिके विजेत्या खेळाडुंनाही आकर्षक बक्षिसे देण्यात आली. त्याचप्रमाणे प्रमुख पाहुणे बर्चस्वा यांच्या हस्ते स्पर्धेत सहभागी संघांच्या मालकांचा स्मृतिचिन्ह देऊन सन्मान करण्यात आला.
स्पर्धेतील वैयक्तिक बक्षिसाचे मानकरी पुढीलप्रमाणे आहेत उत्कृष्ट फलंदाज -केदार ऊसुलकर (साईराज हुबळी टायगर्स), उत्कृष्ट गोलंदाज -सिद्धार्थ हुल्लोळी (अलोन स्पोर्ट्स), मालिकावीर -रोहन यरशिमी (साईराज हुबळी टायगर्स), अंतिम सामन्यातील उत्कृष्ट क्षेत्ररक्षक -करण बोकडे (सुपर एक्सप्रेस). अंतिम सामन्यात अतिशय सुरेख क्षेत्ररक्षण करणाऱ्या करण बोकडे आला क्रिकेटचे चाहते व सामाजिक कार्यकर्ते बबन भोबे यांनी खास मनगटी घड्याळ बक्षिसादाखल दिले.
अंतिम सामन्याला बहुसंख्य क्रिकेटप्रेमींनी गर्दी केली होती. स्पर्धा यशस्वीरित्या पार पाडण्यासाठी बोर्ड ऑफ पेरेंट्स फाॅर क्रिकेट इन बेळगांवच्या पदाधिकारी आणि सदस्यांनी विशेष परिश्रम घेतले.