प्रधानमंत्री आवास योजने (शहरी) अंतर्गत बेळगाव उत्तर आणि दक्षिण मतदारसंघात 2653 घरकुले बांधण्यात येणार आहेत. या घरांच्या उभारणीसाठी निविदा मागवण्यात आल्या आहेत.
प्रधानमंत्री आवास योजना शहरी अंतर्गत बेळगाव शहरात एकुण 2,653 घरे बांधण्यात येणार आहेत. बेळगांव दक्षिण मतदारसंघात यापैकी 1,778 घरांचे बांधकाम केले जाणार आहे. पायाभूत सुविधांसह ही घरे लाभार्थीना उपलब्ध करून दिली जाणार आहेत. याच पद्धतीने बेळगांव उत्तर मतदारसंघात 905 घरकुलांची उभारणी केली जाणार आहे. शहराच्या या दोन्ही मतदारसंघातील प्रामुख्याने निराधार झोपडपट्टीवासीयांसाठी ही घरकुल योजना राबवली जाणार आहे.
प्रधानमंत्री आवास योजना (शहरी) गेल्या 25 जून 2015 रोजी अंमलात आणण्यात आली. शहरी भागातील बेघरांना 2022 पर्यंत घरे उपलब्ध करुन त्यांना आसरा मिळवून देणे हा या योजनेचा मूळ उद्देश आहे. राज्य आणि केंद्रशासित प्रदेशांच्या सहकार्याने या योजनेला मूर्त स्वरूप दिले जात आहे. याबरोबरच केंद्रसरकारने महिला सशक्तिकरण – सबलीकरण याबाबतीत पावले उचलण्यास सुरुवात केली आहे.
महिला सबलीकरणांतर्गत सरकारने महिलांसाठी विशेष योजना आखल्या आहेत. प्रधानमंत्री आवास योजनेत सुद्धा घरच्या स्त्रीला मालकी हक्कासाठी घराचे मालक किंवा सहमालक म्हणजे तिच्या पतीसोबत तिचे नांव जोडणे आवश्यक ठरणार आहे.
