एकतर्फी प्रेमातून वडगाव भागातील एका माजी नगरसेवकाच्या पुतण्याने वर्ग मैत्रिणीच्या भावाला गुंडांकरवी मारहाण केल्याची घटना बुधवारी सकाळी टिळकवाडीमध्ये घडली. यामुळे विद्यार्थी वर्गात खळबळ उडाली असून सदर प्रकाराचा निषेध केला जात आहे.
याबाबतची अधिक माहिती अशी की, टिळकवाडी येथील एका नामांकित महाविद्यालयात शिकणारा एक विक्षिप्त विद्यार्थी आपल्याच महाविद्यालयात शिकणाऱ्या एका मुलीला सातत्याने एसएमएस करून त्रास देत होता. मात्र संबंधित विद्यार्थिनी त्याला भीक घालत नव्हती. शेवटी खूप त्रास झाल्याने हा प्रकार त्या मुलीने आपल्या लहान भावाला सांगितला. त्यानंतर मुलीच्या भावाने संबंधित प्रेमवीराला समजावण्याचा प्रयत्न केला. तथापि बेभान झालेला या प्रेमवीराने आज बुधवारी त्या मुलीच्या भावाला मारहाण केली. बोलेरो गाडीतून आलेल्या प्रेमवीराच्या भाडोत्री गुंडांनी मुलीच्या भावाला मारहाण केली आहे.
मिळालेल्या माहितीनुसार, विक्षिप्त स्वभावाचा संबंधित प्रेमवीर हा खासबाग येथील एका माजी नगरसेवकाचा पुतण्या आहे. त्यामुळेच महाविद्यालयातील अन्य विद्यार्थिनींना देखील वारंवार त्याचा त्रास सहन करावा लागत असतो. तेंव्हा आजच्या मारहाणीच्या घटनेची गंभीर दखल घेऊन टिळकवाडी पोलिसांनी कारवाई करावी व कॉलेज प्रशासनाने सदर प्रेमवीराला चांगली समज द्यावी, तसेच असे प्रकार भविष्यात घडू नयेत याची दक्षता घ्यावी, अशी जोरदार मागणी केली जात आहे.
