पोटात दुखू लागल्याने उपचारासाठी गेलेल्या गर्भिणीच्या बाबतीत सिव्हील हॉस्पिटलने केलेल्या निष्काळजीपणाने तीचा भर रस्त्यातच गर्भपात झाल्याचा दुर्दैवी आणि तितकाच भयानक प्रकार घडला आहे.
सदर महिला ५ महिन्याची गर्भवती होती, ती पोटात दुखू लागल्याने सिव्हील हॉस्पिटलला गेली होती, त्यावेळी पोटातील गर्भ सुस्थितीत नसून गर्भपात करावा लागेल असे तिला सांगण्यात आले.
डॉक्टरांचा सल्ला ऐकून ती गर्भपातास तयार झाली, तिला त्यासाठीचे औषध पाजविण्यात आले, मात्र झोपण्यासाठी खाट देण्यात आली नाही, ती तीन तास तशीच बसून राहिली होती, अखेर कंटाळून ती हॉस्पिटल बाहेर असलेल्या कॅन्टीन मध्ये चहा पिण्यासाठी गेली, त्यावेळी अचानक पोटात कळा सुरु होऊन तिचा गर्भपात चक्क रस्त्यावर झाला.
या प्रकाराला तिने हॉस्पिटल प्रशासनाला जबाबदार धरले आहे. त्यांनी आपल्याला खाट न दिल्याने हा प्रकार झाला असून आपले काही बरे वाईट होईल याचीही काळजी इस्पितळाने घेतली नाही असा आरोप तिने केला आहे.
