बेळगाव लाईव्ह : हातात गणपती बाप्पांची मूर्ती… एका हाताने सायकलचे हँडल… आणि मनात बाप्पांवरील अपार श्रद्धा. गणेश चतुर्थीच्या दिवशी येळ्ळूरचे मारुतीआण्णा कुंडेकर यांनी केलेला हा प्रवास आता केवळ एक व्हिडिओ राहिलेला नाही, तर अनेकांसाठी श्रद्धा आणि कर्तव्याचा भावनिक अनुभव ठरला आहे.
मारुतीआण्णा कुंडेकर हे येळ्ळूर गावातील सायकलवरून गॅस सिलिंडर वितरणाचे काम करतात. गणेश चतुर्थीच्या दिवशी ते वडगाव भागात गॅस वितरणासाठी गेले होते. काम आटोपल्यानंतर येळ्ळूरला परतताना त्यांच्या सोबत होते खुद्द गणपती बाप्पा.
एका हातात गणपतीची मूर्ती धरून आणि दुसऱ्या हाताने सायकल चालवत त्यांनी वडगाव ते येळ्ळूर असा प्रवास पूर्ण केला. त्यांच्या चेहऱ्यावर काम पूर्ण केल्याचे समाधान आणि मनात बाप्पांप्रती असलेली श्रद्धा दिसत होती.
या क्षणाचे चित्रीकरण एका कारचालकाने केले आणि हा व्हिडिओ सोशल मीडियावर शेअर केला. पाहता पाहता या व्हिडिओने प्रचंड प्रतिसाद मिळवला. व्हिडिओला तब्बल 40 लाखांहून अधिक Views आणि 3.52 लाखांहून अधिक Likes मिळाले.
बेळगावसह महाराष्ट्र, कर्नाटक आणि देशभरात हा व्हिडिओ मोठ्या प्रमाणात व्हायरल झाला. अनेकांनी मारुतीआण्णांच्या या कृतीतून ‘काम हीच पूजा’ आणि ‘खरी श्रद्धा ही कृतीतून दिसते’ असा संदेश पाहिला.
याच भावनेचा सन्मान करण्यासाठी सार्वजनिक श्री गणेशोत्सव मंडळ, छत्रपती व्यायाम शाळा, विराट गल्ली आणि शिवाजी नगर, येळ्ळूर यांच्या वतीने मारुतीआण्णांना गणेशोत्सवातील मानाच्या शेवटच्या पूजेचा मान देण्यात आला.
यावेळी मंडळाच्या वतीने मारुतीआण्णांचा विशेष सत्कार करण्यात आला. तसेच त्यांना गणपती बाप्पांची मूर्ती भेट देऊन त्यांच्या श्रद्धेचा आणि सेवाभावी वृत्तीचा गौरव करण्यात आला.
दिवसभराची मेहनत करून उदरनिर्वाह करणाऱ्या एका सामान्य कष्टकरी माणसाने बाप्पांवरील श्रद्धा आपल्या कृतीतून व्यक्त केली… आणि त्याचीच दखल लाखो लोकांनी घेतली.
मारुतीआण्णांचा हा प्रवास एक साधा सायकल प्रवास नव्हता; तो होता कर्तव्य, श्रद्धा आणि भक्तीचा प्रवास.
‘काम हीच पूजा’ आणि ‘बाप्पांवरील श्रद्धा ही मनातच नाही, तर आचरणातही असते’ — हा संदेश देणारी ही कथा गणेशोत्सवाच्या आठवणींमध्ये नक्कीच कायम राहील.
