बेळगाव लाईव्ह: हिंदी भाषेच्या वाढत्या प्रभावाला विरोध करण्यासाठी महाराष्ट्र नवनिर्माण सेना आणि कन्नड रक्षक वेदिके या दोन संघटना एकाच व्यासपीठावर आल्याने महाराष्ट्र-कर्नाटक सीमाभागातील राजकीय चर्चेला नवा मुद्दा मिळाला आहे. मराठी भाषा, मराठी अस्मिता आणि महाराष्ट्र धर्मासाठी आक्रमक भूमिका घेणाऱ्या मनसेने कन्नड भाषा आणि कन्नड अस्मितेसाठी कट्टर भूमिका घेणाऱ्या कन्नड रक्षक वेदिकेसोबत हातमिळवणी केल्याने बेळगावातील मराठी भाषिकांच्या प्रश्नावर या समीकरणाचा परिणाम काय होणार? असा सवाल सीमाभागातून उपस्थित होत आहे.
कर्नाटकात झालेल्या बैठकीत मनसे नेते संदीप देशपांडे, मनसे सरचिटणीस योगेश परुळेकर आणि कन्नड रक्षक वेदिकेचे प्रदेशाध्यक्ष टी. ए. नारायण गौडा यांच्यात हिंदी भाषेच्या कथित आक्रमणाविरोधात संयुक्तपणे लढा देण्याबाबत चर्चा झाली. भाषा, सांस्कृतिक अस्मिता आणि बदलती लोकसंख्या यामुळे देशातील विविध राज्यांमध्ये निर्माण होणाऱ्या प्रश्नांवरही बैठकीत विचारविनिमय करण्यात आला.
या बैठकीत १० कलमी ‘कॉमन मिनिमम प्रोग्राम’ तयार करून तो प्रसिद्ध करण्याचा निर्णय घेण्यात आला आहे. तसेच ऑक्टोबर-नोव्हेंबरदरम्यान दिल्लीत होणाऱ्या ‘इंडियन लँग्वेजेस फोरम’च्या महाअधिवेशनाच्या पार्श्वभूमीवर विविध भारतीय भाषांच्या प्रश्नांना राष्ट्रीय पातळीवर मांडण्याची तयारीही करण्यात येणार असल्याचे सांगण्यात आले.
मात्र, या सगळ्या घडामोडींमध्ये बेळगावचा सीमाप्रश्न आणि येथील मराठी भाषिकांचा मुद्दा केंद्रस्थानी येत आहे.
कन्नड रक्षक वेदिकेची बेळगावातील मराठी भाषिकांबाबतची भूमिका आणि मनसेची सीमाभागातील मराठी अस्मितेबाबतची भूमिका यामध्ये मूलभूत फरक असल्याचे यापूर्वी अनेकदा दिसून आले आहे. त्यामुळे हिंदीविरोधाच्या समान मुद्द्यावर दोन्ही संघटना एकत्र येत असताना सीमाभागातील मराठी भाषिकांच्या हक्कांबाबत या दोन्ही संघटनांची भूमिका एकाच दिशेने जाणार आहे का? हा प्रश्न उपस्थित होत आहे.
विशेष म्हणजे, मनसेचे प्रवक्ते संदीप देशपांडे यांनी कन्नड रक्षक वेदिकेच्या नेत्यांसोबत घेतलेल्या भूमिकेमुळे महाराष्ट्रातील राजकीय वर्तुळातही चर्चा सुरू होण्याची शक्यता आहे. हिंदीविरोधासाठी कन्नड अस्मितेच्या संघटनेसोबत मनसेची जवळीक स्वीकारार्ह असेल, तर बेळगावातील मराठी भाषिकांच्या प्रश्नावर मनसेची भूमिका नेमकी काय राहणार? असा सवाल सीमाभागातील मराठी भाषिकांकडून उपस्थित केला जात आहे.
यामुळे ही बैठक केवळ हिंदीविरोधी आंदोलनाचा रोड मॅप ठरवणारी बैठक आहे की, महाराष्ट्र-कर्नाटकातील भाषिक राजकारणाची नवी समीकरणे तयार करण्याची सुरुवात आहे, याकडे आता लक्ष लागले आहे.
हिंदीविरोधात समान भूमिका; पण बेळगावच्या मराठी प्रश्नावर मतभेद — मनसे-कन्नड रक्षक वेदिकेची ही जवळीक सीमाभागात नवा राजकीय प्रश्न निर्माण करणार का? हा मुद्दा आगामी काळात अधिक चर्चेत येण्याची शक्यता आहे.
