बेळगाव लाईव्ह : खानापूर तालुक्यातील नागरगाळी येथील सुलेगाळी परिसरात रविवारी दोन जंगली हत्तींचा विद्युत प्रवाह लागून मृत्यू झाल्याच्या घटनेची राज्य सरकारने गंभीर दखल घेतली असून, वनमंत्री ईश्वर खंड्रे यांनी या प्रकरणाची चौकशी करण्याचे आदेश दिले आहेत.
वनमंत्री खंड्रे यांनी सांगितले की, या घटनेत वन विभागाच्या अधिकाऱ्यांनी हत्तींच्या वावराच्या क्षेत्रात आवश्यक ती खबरदारी न घेतल्याचा आरोप समोर आला आहे. त्यांनी मुख्य वनसंरक्षक (PCCF) यांना या प्रकरणी तातडीने गुन्हा दाखल करून सखोल चौकशी करण्याचे आणि पाच दिवसांत सविस्तर अहवाल सादर करण्याचे निर्देश दिले आहेत.
दरम्यान, वन विभागाने घटनेचा तपास सुरू केला असून दोन शेतकऱ्यांविरुद्ध वन्यजीव संरक्षण कायद्यांतर्गत (Wildlife Protection Act) गुन्हा दाखल केला आहे. हा गुन्हा नागरगाळी वन विभाग कार्यालयात नोंदविण्यात आला आहे. तसेच शेतजमिनीतील पडलेल्या विजेच्या तारा संबंधित तक्रारींच्या पार्श्वभूमीवर हेस्कॉम (HESCOM) विभागालाही नोटीस बजावण्यात आली आहे. मात्र, वन विभागाकडे सरकारी कर्मचाऱ्यांविरुद्ध थेट गुन्हा नोंदविण्याचे अधिकार नसल्यामुळे हेस्कॉम अधिकाऱ्यांवर थेट कारवाई करण्यात अडचण येत असल्याचे अधिकाऱ्यांचे म्हणणे आहे.
या प्रकरणात गणपती सातेरी गुरव या शेतकऱ्याला पोलिसांनी अटक केली असून त्याला न्यायालयीन कोठडीत पाठविण्यात आले आहे. दुसरा आरोपी शिवाजी गणपती गुरव फरार असून पोलिस त्याचा शोध घेत आहेत.
दरम्यान, हेस्कॉमच्या बेळगाव पथकाने सोमवारी सुलेगाळीला भेट देऊन तपासणी केली. काही शेतकऱ्यांनी “वीजवाहिन्या तुटून पडल्यामुळे हत्तींचा मृत्यू झाला” असा दावा केला असला तरी, हेस्कॉमच्या तपासात वीजवाहिन्या अपघाताने तुटल्या नसून त्या नंतर मुद्दाम खेचून पसरविण्यात आल्याचा संशय व्यक्त करण्यात आला आहे.
तपासात हेही समोर आले आहे की, गणपती गुरव यांनी त्यांच्या शेतात iBox सौर कुंपण (solar fence) बसवले होते. परंतु, अलीकडच्या दिवसांत पुरेसा सूर्यप्रकाश न मिळाल्याने ते योग्यरित्या कार्यरत नव्हते. त्यानंतर त्यांनी हेस्कॉमच्या विजेच्या लाईनमधून थेट जोडणी करून हे कुंपण विद्युत प्रवाहाने सक्रिय केले, असा आरोप आहे.
हेस्कॉम आणि वन विभागाच्या संयुक्त तपासात हे स्पष्ट झाले की, हत्तींचा मृत्यू या थेट विद्युत प्रवाहित कुंपणाला स्पर्श झाल्यानेच झाला.
🐘 हत्तींचे दहन वन विभागाच्या उपस्थितीत
वन विभागाच्या नियमांनुसार, सोमवारी नागरगाळी वनक्षेत्रात डॉ. अयाज, डॉ. नागराज हुलेगोल आणि डॉ. मधुसूदन यांनी दोन्ही हत्तींचे शवविच्छेदन केले. त्यानंतर दोन्ही मृत हत्तींचे अवशेष JCB च्या सहाय्याने ठिकाणीच दहन व दफन करण्यात आले. या वेळी मुख्य वनसंरक्षक म. म. चव्हाण, डीसीएफ एन. ई. क्रांती, एसीएफ शिवानंद मगदूम, नगराज बाळेहोसुर, सुनीता निम्बर्गी, तसेच वन्यजीव प्रेमी, महसूल आणि पोलीस अधिकारी उपस्थित होते.
🔥 काँग्रेस नेत्यांचा आरोप — “वन विभाग स्वतःचा दोष लपवत आहे”
ईश्वर घाडी, अध्यक्ष, ब्लॉक काँग्रेस कमिटी, खानापूर यांनी वन विभागावर निष्काळजीपणा झाकण्यासाठी निष्पाप शेतकऱ्यांवर खोटे गुन्हे दाखल केल्याचा आरोप केला आहे. त्यांनी सांगितले की, “या घटनेला वन विभाग आणि हेस्कॉम दोघांच्याही निष्काळजीपणाचे कारण आहे. जर हेस्कॉम आणि संबंधित वन अधिकाऱ्यांवर तातडीने गुन्हा दाखल झाला नाही, तर काँग्रेस पक्ष तीव्र आंदोलन छेडेल,” असा इशारा त्यांनी दिला.
