बेळगाव लाईव्ह : भरधाव कार आणि कर्नाटक परिवहन मंडळाच्या बसची समोरासमोर धडक झाल्याने घडलेल्या भीषण अपघातात तिघेजण जागीच ठार झाल्याची घटना अथणी (जि. बेळगाव) तालुक्यातील मुरगुंडी गावाजवळ अथणी पोलीस स्थानकाच्या हद्दीत घडली.
अपघातात बसमधील काही प्रवासी गंभीर जखमी झाले आहेत.अपघातात ठार झालेल्यांची नावे राहुल, गिरीश आणि सागू (तिघेही रा. अफजलपुर, जि. गुलबर्गा) अशी आहेत. मिळालेल्या माहितीनुसार अथणीहून मिरजेला जाणाऱ्या केएसआरटीसी परिवहन मंडळाच्या विजयपूर आगाराच्या बसला कोल्हापूरहून अफजलपुरला जाणाऱ्या भरधाव कार गाडीने धडक दिली.
ही धडक इतकी जबरदस्त होती की कारच्या दर्शनीय भागाचा चक्काचूर होण्याबरोबरच कार मधील चौघांपैकी तिघा जणांचा जागीच मृत्यू झाला. अपघातात बसमधील काही प्रवासी गंभीर जखमी झाले असून जखमींना उपचारासाठी अथणी सरकारी रुग्णालयात दाखल करण्यात आले आहे. अपघाताची अथणी पोलीस ठाण्यात नोंद झाली आहे.
