बेळगाव लाईव्ह :भारताने पाकिस्तानातील दहशतवाद्यांविरुद्ध हाती घेतलेल्या ‘ऑपरेशन सिंदूर’ मोहिमेच्या पार्श्वभूमीवर खबरदारीची उपाययोजना म्हणून बेळगावसह राज्यातील धरणांची सुरक्षा व्यवस्था वाढविण्यात आली आहे.
ऑपरेशन सिंदूरच्या पार्श्वभूमीवर हुक्केरी (जि. बेळगाव) तालुक्यातील घटप्रभा नदीवर हिडकल येथे असलेले राजा लखमगौडा जलाशय (हिडकल डॅम) आणि सौंदत्ती तालुक्यातील नवलतीर्थ येथे असलेल्या रेणुका सागर जलाशय (मलप्रभा डॅम) या ठिकाणी खबरदारी म्हणून सार्वजनिकांना प्रवेश बंदी करण्यात आली आहे.
हिडकल धरणाच्या परिसरात 24 तास खडा पहारा ठेवण्यात आला असून धरण परिसरात हाय पॉवर सीसीटीव्ही कॅमेरे बसविण्यात आले आहेत. धरणाच्या सुमारे 4 कि.मी. अंतराच्या हालचाली या कॅमेऱ्याद्वारे टिपण्यात येत आहेत. धरण परिसरात कोणत्याही अनोळखी व्यक्तीसह पर्यटकांना जाण्यावर निर्बंध घालण्यात आले आहेत.
सदर दोन जलाशयांसह शिरूर डॅम व राकसकोप डॅमची सुरक्षाही वाढविण्यात आली आहे. या परिसरात येणाऱ्या पर्यटकांच्या हालचालीवर देखील बारीक लक्ष ठेवण्यात येत आहे. दहशतवाद्यांच्या यादीतील आलमट्टी धरणावर ‘हाय अलर्ट’ जारी करण्यात आला असून तेथे कडेकोट बंदोबस्त ठेवण्यात आला आहे.
आलमट्टी जलाशयाची सुरक्षा कर्नाटक राज्य औद्योगिक सुरक्षा दलाच्या (केएसआयएसएफ) अखत्यारीत आहे. राज्य गृह खात्याच्या सूचनेनुसार राज्यातील धरणे, जलाशयांसह महत्त्वाच्या ठिकाणी पोलिसांच्यावतीने सुरक्षा व्यवस्था वाढविण्यात आली आहे.
