बेळगाव लाईव्ह :मराठा समाजाच्या सर्वांगीण प्रगतीसाठी आणि गुरुकुल निर्मितीसाठी आवश्यक विचारमंथन करण्याच्या उद्देशाने राज्य क्षत्रिय मराठा समाज जागृती महासभेचे भव्य आयोजन करण्यात आले आहे.
हा ऐतिहासिक सोहळा 30 मार्च 2025 रोजी संध्याकाळी 4:00 वाजता, मराठा विद्या प्रसार मंडळाच्या छत्रपती संभाजीराजे सभागृहात (राम जाधव मार्ग, सौंदती रोड, धारवाड) संपन्न होणार आहे.
गुढी पाडव्याच्या पावन पर्वावर समाजाच्या एकसंधतेचा आणि प्रगतीचा निर्धार करण्यासाठी समाजबांधवांनी एकत्र यावे, असे आवाहन आयोजकांनी केले आहे. या सोहळ्यास जगद्गुरू वेदांताचार्य मंजूनाथ भारती महास्वामीजी यांचे दिव्य सान्निध्य लाभणार आहे.
कार्यक्रमाचे उद्घाटन संतोष लाड, मंत्री, कर्नाटक सरकार यांच्या हस्ते होणार असून, मराठा विद्या प्रसार मंडळ, धारवाडचे अध्यक्ष मनोहर मोरे हे अध्यक्षपद भूषवणार आहेत. या महासभेत मराठा समाजाच्या आर्थिक, शैक्षणिक आणि सामाजिक उन्नतीसाठी नव्या योजनांची घोषणा केली जाणार आहे.
विशेषतः गुरुकुल निर्मिती आणि युवा पिढीच्या सशक्त भविष्यासाठी आवश्यक उपक्रमांवर सखोल चर्चा केली जाणार आहे. समाजातील प्रत्येक घटकाने या विषयांवर विचार करावा, असे आवाहन संयोजकांनी केले आहे.
या सोहळ्यास पी. जी. आर. सिंधिया, माजी गृहमंत्री, कर्नाटक सरकार; श्रीमंत पाटील, माजी मंत्री, कर्नाटक सरकार; प्रकाश पागोजी, व्यवस्थापक व संचालक, मराठा समुदाय अभिवृद्धी निगम, कर्नाटक सरकार; श्रीनिवास माने, आमदार; एम. जी. मूळे, एम.एल.सी.; विठ्ठल हलगेकर, आमदार, खानापूर; डॉ. अंजली निंबाळकर, माजी आमदार; सुरेशराव साठे, राज्याध्यक्ष, के.के.एम.पी.; मनोज कुमार रण्णोरे, अध्यक्ष, के.एम.डब्ल्यू.ए.; रुपाली नाईक, माजी आमदार, कारवार; आणि अनिल बेनके, माजी आमदार, बेळगाव यांच्यासह विविध क्षेत्रातील मान्यवर उपस्थित राहणार आहेत.
मराठा समाजाच्या भविष्यासाठी आपली मते मांडण्यासाठी, नव्या संकल्पनांना पाठिंबा देण्यासाठी आणि समाजाच्या उज्ज्वल प्रगतीसाठी 30 मार्च 2025 रोजी संध्याकाळी 4:00 वाजता धारवाड येथे उपस्थित राहण्याचे आवाहन आयोजकांनी केले आहे.
