बेळगाव लाईव्ह : बेळगावमधील तिसऱ्या रेल्वे गेटजवळील रस्त्याची दुरवस्था लक्षात घेता, वाहतूक विभागाने तिथे ‘वन वे’ मार्ग घोषित केला आहे. गेल्या दोन दिवसांपूर्वी या मार्गाच्या संदर्भात एक महत्त्वपूर्ण घोषणा करण्यात आली.
रस्त्याची खराब स्थिती आणि वाहतुकीची वाढती समस्या पाहता, वाहतूक विभागाने या मार्गावर डाव्या बाजूने जाण्यास बंदी घालण्याचा निर्णय घेतला आहे. नवीन नियमाच्या अंतर्गत, आता केवळ उजव्या बाजूनेच वाहतूक होणार आहे. त्याचबरोबर, डाव्या बाजूने वाहतूक करणाऱ्यांवर कारवाई करण्याचा इशारा पोलिसांनी दिला आहे.
तथापि, काही नागरिक ‘वन वे’ मार्गाचे उल्लंघन करत असल्याचे आढळून येत असल्याने यामुळे वाहतूक कोंडी होण्याची आणि समस्या उद्भवण्याची शक्यता आहे. नागरिकांच्या सोयीसाठी घेण्यात आलेल्या या नवीन आदेशाचे पालन करणे अत्यंत महत्त्वाचे आहे, जेणेकरून वाहतुक सुरळीत होईल.
‘वन वे’ मार्गाचे कठोरपणे पालन करणे गरजेचे असून नियमांचे उल्लंघन करणाऱ्यांवर कारवाई केली जाईल, असेही वाहतूक विभागाने सुचवले आहे.
या निर्णयामुळे बेळगावमधील तिसऱ्या रेल्वे गेटजवळील वाहतूक व्यवस्थापन सुधारण्याची आशा आहे. मात्र नागरिकांनीही वाहतूक विभागाचे नियम पाळून सहकार्य करणे गरजेचे आहे.
