बेळगाव लाईव्ह :सांबरा येथील श्री महालक्ष्मी देवी यात्रेला हजारो भाविकांनी केलेल्या तुफान गर्दीमुळे पुणे बेंगलोर -राष्ट्रीय महामार्गावर मोठी वाहतूक कोंडी होऊन ‘मेगा ब्लॉक’ झाल्याची घटना आज शनिवारी दुपारी घडली.
सध्या सांबरा (ता. जि. बेळगाव) येथे श्री महालक्ष्मी देवीचा यात्रोत्सव सुरू आहे. तब्बल 18 वर्षानंतर प्रथमच होत असलेल्या या यात्रेसाठी आज हजारो भाविकांनी गर्दी केली आहे. शुक्रवार शनिवार आणि रविवार असे तीन दिवस सांबरा महालक्ष्मी यात्रेत मोठ्या प्रमाणात गर्दी होणार आहे.
सदर भाविक देवीच्या दर्शनासाठी मोठ्या संख्येने वाहने घेऊन येत असल्यामुळे आज सकाळपासून महामार्गावरील वाहतुकीचा ताण वाढला होता. हा ताण इतका वाढला की दुपारी कुडची ते सांबरा दरम्यान महामार्गावर वाहतूक कोंडी होऊन मेगाब्लॉक झाला.
त्यामुळे महामार्गावरील वाहतूक संपूर्णपणे विस्कळीत झाली. वाहतूक कोंडीत अडकल्याने विशेष करून प्रवासी वाहनांमधील प्रवाशांना मनस्ताप सहन करावा लागला. दुसरीकडे चक्काजाम झाल्यामुळे अनेक वाहन चालकांनी पर्यायी मार्ग अवलंबणे पसंत केले.
जिल्हा माहिती अधिकारी गुरुनाथ कडबुर यांनी सांबरा मार्गे होणारी रहदारी विस्कळीत झाल्याची माहिती दिली असून या मार्गाने जाऊ इच्छिणाऱ्यांनी पर्यायी मार्ग अवलंबावा असे आवाहन केले आहे. दरम्यान बेळगाव विमानतळावर दुपारी होणाऱ्या उड्डाणांसाठी ये -जा करणाऱ्या प्रवाशांची ही गैरसोय होणार आहे. सांबरा येथील श्री लक्ष्मी देवी यात्रेसाठी भाविकांची प्रचंड गर्दी झाली आहे. तसेच वाहतूक नियंत्रणासाठी रहदारी पोलिसांची संख्या कमी पडत असल्यामुळे महामार्गावर वाहतूक कोंडीची समस्या उद्भवली आहे.
विशेष म्हणजे सांबरा महालक्ष्मी यात्रेला ये जा करणाऱ्यांसह बेळगाव विमानतळावर इजा करणाऱ्या प्रवाशांनाही या ट्रॅफिक जामचा मनस्ताप सहन करावा लागला. उद्या रविवार देखील अशाच पद्धतीचा मोठा ट्राफिक जाम होण्याची शक्यता असून पोलिसांनी यावर पर्यायी व्यवस्था करावी अशी मागणी केली जात आहे.
