बेळगाव लाईव्ह:मराठा समाज व मराठी भाषिकांना मार्गदर्शन करण्यासाठी येणारे मराठा योद्धा मनोज जरांगे -पाटील यांच्या उद्या मंगळवार दि 30 एप्रिल रोजी होणाऱ्या जाहीर सभेस सर्वांनी हजारोंच्या संख्येने उपस्थित रहावे, असे आवाहन बेळगाव शहर महाराष्ट्र एकीकरण समितीचे अध्यक्ष माजी नगरसेवक रणजीत चव्हाण -पाटील यांनी केले आहे.
महाद्वार रोड येथील छ. संभाजी महाराज उद्यानाच्या मैदानावर उद्या मंगळवारी 30 एप्रिल रोजी मराठा योद्धा मनोज जरांगे -पाटील यांच्या जाहीर सभेचे आयोजन करण्यात आले आहे.
सदर सभेची जय्यत तयारी करण्यात येत असून छ. संभाजी महाराज उद्यान येथे आज सोमवारी सकाळी या तयारीची पाहणी केल्यानंतर रणजीत चव्हाण -पाटील बेळगाव लाईव्हशी बोलत होते. ते म्हणाले की, मराठा योद्धा मनोज जरांगे -पाटील यांच्या उद्या 30 एप्रिल रोजी या ठिकाणी होणाऱ्या जाहीर सभेबद्दल सध्या शहरातील मराठी भाषिक आणि मराठा समाजामध्ये उत्सुकतेचे वातावरण आहे.
जरांगे -पाटील हे आपल्या वचनानुसार मराठा समाजाला मार्गदर्शन करण्यासाठी आणि सीमाभागातील मराठा आणि मराठी भाषिकांच्या व्यथा ऐकण्यासाठी उद्या बेळगाव मध्ये दाखल होत आहेत आम्ही ज्यावेळी महाराष्ट्रात त्यांना भेटण्यासाठी गेलो होतो त्यावेळी सीमाप्रश्नी आणि मराठी भाषिकांच्या व्यथांमध्ये मी लक्ष घालेन असे आश्वासन दिले होते.
आपल्या या आश्वासनाच्या पूर्तीसाठी ते बेळगावला येत असून त्यांच्याशी आमची जेंव्हा खाजगीत चर्चा झाली त्यावेळी हा सीमाप्रश्न इतका तीव्र आहे आणि मराठा व मराठी भाषिकांच्या जीवनमरणाचा प्रश्न आहे.
त्यामुळे ही बाब पंतप्रधानांपर्यंत घेऊन जाण्याचा माझा विचार आहे असे ते म्हणाले होते. तेंव्हा त्यांच्या उद्याच्या जाहीर सभेला बेळगाव शहर व ग्रामीण भागातून कोणीही मागे न राहता सर्वांनी हजारोंच्या संख्येने उपस्थित राहुल सभा यशस्वी करावी, असे आवाहन मराठा समाज व मराठी भाषिकांच्यावतीने शहर म. ए. समितीचे अध्यक्ष रणजीत चव्हाण -पाटील यांनी केले. याप्रसंगी समितीचे अन्य पदाधिकारी व कार्यकर्ते उपस्थित होते.
