बेळगाव लाईव्ह :कर्नाटक राज्य शासनाने सर्पदंशाला अधिसूचित आजारांच्या यादीत समाविष्ट केले असून याबाबतची अधिसूचना गेल्या 12 फेब्रुवारी रोजी जारी करण्यात आली आहे. असा निर्णय घेणारे कर्नाटक हे देशातील पहिले राज्य असल्याचा दावा करण्यात आला आहे.
सर्पदंशाला अधिसूचित आजारांच्या यादीत समाविष्ट केल्यामुळे राज्यातील कोणत्याही ठिकाण झालेल्या सर्पदवसाच्या घटनांची नोंद आता राज्य पातळीवर केली जाणार आहे. सर्वांगीण आरोग्य माहिती मंच मधील सर्व आरोग्य सुविधांमध्ये सर्पदंशाचा समावेश झाला आहे.
सरकारी व खाजगी हॉस्पिटल्स, वैद्यकीय संस्थांमध्ये दाखल झालेले सर्पदंशाचे रुग्ण, सर्पदंशावर हॉस्पिटलमध्ये उपचार घेणारे, बाह्य रुग्णांची माहिती, सर्पदंशाच्या मृत्यूची नोंद आरोग्य मंचमध्ये केली जाणार आहे. याचा अर्थ राज्यातील कोणत्याही सरकारी किंवा खाजगी हॉस्पिटल मध्ये सर्पदंश प्रकरण आल्यास त्याची नोंद सर्वांगीण रोग नियंत्रण कार्यक्रमाच्या फाईलमध्ये होणार आहे.
राज्यामध्ये वाढलेल्या सर्पदशांच्या घटनांमुळे सरकारने हा निर्णय घेतला आहे. आरोग्य खात्याने दिलेल्या माहितीनुसार गेल्या वर्षी जानेवारी ते ऑक्टोबर या काळात कर्नाटकात सर्पदंशाच्या 5,316 घटना घडल्या होत्या. यापुढे राज्यातील प्रत्येक सर्पदंश घटनेची सविस्तर माहिती राज्य सरकार नोंदवून घेणार आहे.
नियंत्रणासाठी अधिक माहिती संग्रहित केली जाणार असून त्यानंतर सर्पदंशाच्या घटनांबाबत जागृती करून त्यावर नियंत्रण मिळवण्यासाठी उपाययोजना केल्या जाणार आहेत. मानव आणि साप यांच्यातील शत्रुत्व कमी करण्यासाठी सरकारचे हे पाऊल महत्त्वाचे असल्याचे मत तज्ञांनी व्यक्त केले आहे.
