बेळगाव लाईव्ह: स्टार एअरलाइन्सची बेळगाव ते इंदोर विमान सेवा बंद केल्यामुळे प्रवाशांची मोठी गैरसोय होत असून ही विमान सेवा लवकरात लवकर पूर्ववत सुरू करण्यात यावी, अशी जोरदार मागणी केली जात आहे.
मुंबई, बेंगलोर, दिल्ली प्रमाणे बेळगाव येथील लोकांचे नोकरी-व्यवसाय कामधंद्यानिमित्त इंदोरला मोठ्या प्रमाणात ये -जा सुरू असते.
यापूर्वी बेळगाव ते इंदोर अशी स्टार एअरची थेट विमानसेवा उपलब्ध होती. त्यामुळे इंदोरला जाणाऱ्या बेळगावच्या प्रवाशांची चांगली सोय होत होती. या विमानसेवेला प्रवाशांचा देखील मोठा प्रतिसाद मिळत होता. मात्र अलीकडे कांही महिन्यापासून सदर विमान सेवा बंद करण्यात आली आहे.
बेळगाव ते इंदोर अशी रेल्वे, बस वगैरे कोणतीही प्रवासी वाहतूक सेवा उपलब्ध नाही. त्यामुळे तातडीच्या कामासाठी स्टार एअरची विमानसेवा बेळगावच्या लोकांसाठी अनुकूल ठरायची. मात्र आता ती बंद झाल्यामुळे प्रवाशांची मोठी गैरसोय होत आहे.
इंदोरला आता थेट न जाता प्रवाशांना जास्त अंतराचा प्रवास करावा लागत असून वेळेचा अपव्यय होत असल्यामुळे तीव्र नाराजी व्यक्त होत आहे. त्यासाठी बेळगाव ते इंदोर विमान सेवा लवकरात लवकर पूर्ववत सुरू करण्याची जोरदार मागणी केली जात आहे.