बेळगाव लाईव्ह:बेळगाव शहरातील गणपत गल्ली, खडेबाजार कॉर्नरवर मुख्य जलवाहिनीच्या व्हॉल्वला गळती लागून वाया जात असलेल्या हजार लिटर पाण्यासंदर्भात काल बेळगाव लाईव्हने प्रसिद्ध केलेल्या वृत्ताची दखल घेत पाणीपुरवठा विभागाकडून आज युद्धपातळीवर गळती दुरुस्तीचे काम हाती घेण्यात आले आहे
गणपत गल्ली, खडेबाजार कॉर्नरवर रस्त्याकडेला असलेल्या भूमिगत मुख्य जलावाहिनीच्या व्हॉल्वला गेल्या 15 दिवसांपासून गळती लागल्यामुळे दररोज हजारो लिटर पाणी रस्त्यावर वाहून वाया जात होते.
या संदर्भात तक्रार करून देखील दखल घेतली जात नसल्याने स्थानिक व्यापारी व विक्रेत्यांनी बेळगाव लाईव्हच्या प्रतिनिधीकडे वाया जाणाऱ्या पाण्याबाबत आपली व्यथा मांडली होती.
त्यासंदर्भात बेळगाव लाईव्हने काल मंगळवारी ”या’ पाणी गळतीकडे कोणी लक्ष देईल का?’ अशा शीर्षकाखाली वृत्त प्रसिद्ध केले होते. सदर वृत्ताची दखल घेत शहराच्या पाणीपुरवठ्याची जबाबदारी असलेल्या एल अँड टी कंपनीकडून आज बुधवारी युद्धपातळीवर गळती दुरुस्तीचे काम हाती घेण्यात आले आहे.
गणपत गल्ली खडेबाजार कॉर्नरवर बॅरिकेट्स लावून खुदाई करण्याद्वारे एल अँड टी चे कर्मचारी आज दिवसभर गळती लागलेल्या व्हॉल्व दुरुस्तीच्या कामात व्यस्त असल्याचे पाहायला मिळाले.
यामुळे या रस्त्यावरून नेहमी ये-जा करणारे नागरिक आणि परिसरातील व्यापारी, विक्रेत्यांमध्ये समाधान व्यक्त होत असून ते बेळगाव लाईव्हला धन्यवाद देत आहेत.
