बेळगाव लाईव्ह:दुष्काळ, उत्तर कर्नाटकातील समस्या या विषयांतील चर्चात केंद्र सरकारचा विफलपणा लोकांसमोर येऊ नये, यासाठी भाजपकडून जाणीवपूर्वक सभागृहाचा वेळ वाया घालवण्यात येत आहे. मंत्री जमीर अहमद खान यांनी कोणतेही असंविधानिक वक्तव्य केले नाही. तरीही सरकारविरोधात आंदोलन करण्यात येत आहे. भाजप उत्तर कर्नाटक, लोकशाही आणि संविधानविरोधी आहेत, अशी घणाघाती टीका मुख्यमंत्री सिद्धरामय्या यांनी सोमवारी विधानसभेत केली.
विधानसभेत आज मंत्री जमीर अहमद खान यांच्याविरोधात भाजप आमदारांनी धरणे आंदोलन सुरू केले. त्यामुळे दुपारच्या सत्रात मुख्यमंत्री सिद्धरामय्या यांनी सभागृहात भाजपच्या आमदारांना उत्तर दिले.
मुख्यमंत्री सिद्धरामय्या म्हणाले, आम्ही नेहमीच संविधानाचा गौरव करत आलो आहोत. प्रश्नोत्तराच्या तासाला दुसरा विषय घेणे असंविधानिक आहे. मी मंत्री जमीर अहमद यांची चौकशी केली आहे. त्यांनी हैदराबाद येथे महिनाभरापूर्वी प्रचार केला. त्यावेळी त्यांनी कोणतेही असंसदिय वक्तव्य केले नाही.
मुस्लिम सभेत बोलताना त्यांनी काँग्रेसने आमच्या समुदायाला अध्यक्षस्थान दिले आहे, असे सांगितले आहे. यात काहीच चूक नाही. मंत्री खान यांना कामकाजाचा मोठा अनुभव आहे. ते सात वेळा आमदार झाले आहेत. महिनाभरापूर्वी करण्यात आलेल्या वक्तव्यावर अधिवेशन सुरू होऊन पाच दिवस झाल्यानंतर का चर्चा करायची आहे, हाच प्रश्न आहे.
अधिवेशनात दुष्काळ आणि उत्तर कर्नाटकावर चर्चा होणे अपेक्षित आहे. आम्ही त्यासाठी तयार आहोत. दुष्काळ निवारण्यासाठी आमची सर्व तयारी झाली आहे. पिण्याचे पाणी, चारा या विषयावर जिल्हाधिकार्यांना सूचना केल्या आहेत. स्थलांतर रोखण्यासाठी रोहयोतून दीडशे दिवस काम द्यावे, अशी मागणी केंद्राकडे करुनही त्यावर अद्याप निर्णय घेण्यात आलेला नाही. केंद्र सरकार दुजाभाव करत आहे, याची विरोधी पक्षाला लाज वाटली पाहिजेत.
दुष्काळ आणि उत्तर कर्नाटकातील समस्या या विषयावरील चर्चा आपल्या अंगलट येणार असल्यामुळेच भाजप आमदार कोणतीही नोटीस न देता मंत्री खान यांच्याविरोधात चर्चेचा आग्रह धरत आहेत. त्यामुळे भाजप संविधान, लोकशाही आणि उत्तर कर्नाटक विरोधी आहे. नोटीस द्या, आम्ही चर्चा करण्यास तयार आहोत. आम्ही पलायन करणारे नव्हे. मी स्वत: उत्तर देईन. पण, तुम्ही चर्चेला तयार नाही, तुम्ही लोकांशी द्रोह करत आहात, असा आरोप मुख्यमंत्री सिद्धरामय्या यांनी केला.
