बेळगाव लाईव्ह :बेळगाव शहर परिसर, खानापूर तालुका आणि नजीकच्या चंदगड तालुक्यातून रेल्वे मार्गे पंढरपूरला जाणाऱ्या भाविकांची संख्या मोठी आहे.
येत्या 23 नोव्हेंबरला कार्तिक एकादशी असल्यामुळे 21 नोव्हेंबर ते 26 नोव्हेंबर या काळात बेळगाव ते पंढरपूर रेल्वेची सोय करण्यात यावी. अशी भाविकांची मागणी आहे.
दरवर्षी पंढरपूरला आषाढी आणि कार्तिकी अशा दोन वाऱ्या होतात. दरम्यान आषाढी वारीला मोठ्या प्रमाणात गर्दी असली तरी कार्तिकी वारीला पंढरपूरला जाणाऱ्या आणि त्यातून रेल्वेने प्रवास करणाऱ्या प्रवाशांची संख्या मोठी आहे.
या पार्श्वभूमीवर या दोन्ही मार्गावर प्रवास करण्यासाठी 21 नोव्हेंबर ते 26 नोव्हेंबर या काळात पंढरपूर साठी विशेष धार्मिक रेल्वे सेवा उपलब्ध करून देण्यात यावी अशी मागणी केली जात आहे.
यापूर्वी सुरू असलेली ही सेवा बंद केल्याने प्रवाशांची गैरसोय होत आहे. खाजगी वाहनातून पंढरपूर पर्यंत प्रवास करावा लागतो किंवा मिरज पर्यंत जाऊन मिरजेतून पंढरपूर साठी रेल्वे घेण्याची वेळ भाविकांवर येऊन ठेवली आहे.
वारकरी संप्रदायातील मंडळींचा विचार करून तसेच कार्तिक वारीच्या निमित्ताने पंढरपूरला जाणाऱ्या भाविकांची सोय करण्यात यावी अशी मागणी होत आहे.
