बेळगाव लाईव्ह :कर्नाटक विधिमंडळाच्या आगामी हिवाळी अधिवेशनासाठी येणाऱ्या मुख्यमंत्री व अन्य प्रमुख मंत्र्यांच्या निवासाची सोय विश्वेश्वरय्या तांत्रिक विद्यापीठासह शासकीय व खाजगी विश्रामगृहांमध्ये केली जाणार असून आमदार व अधिकाऱ्यांसाठी बेळगाव शहर परिसरातील 75 हॉटेल्स मधील एकूण 2009 खोल्या आरक्षित करण्यात येणार आहेत.
बेळगाव सुवर्ण विधान सौध येथे येत्या 4 ते 15 डिसेंबर या कालावधीत कर्नाटक विधिमंडळाचे हिवाळी अधिवेशन आयोजित करण्याचे नियोजन आहे. या अधिवेशनाबाबतची अधिकृत घोषणा अद्याप झालेली झालेली नाही अधिवेशन घेण्याचा निर्णय झाला की सर्वप्रथम निवास व्यवस्थित नियोजन केले जाते.
त्याची जबाबदारी महापालिका प्रशासनाकडे असते. त्यानुसार बेळगाव महापालिकेला निवास व्यवस्था करण्याची सूचना देण्यात आली आहे. महापालिकेने देखील शहरातील हॉटेल मालकांची बैठक घेऊन अधिवेशनाबाबत त्यांना सूचित केले आहे.
गेल्या 2021 मध्ये शहरातील कांही हॉटेल्सनी आपल्याकडील कांही खोल्या स्वतःसाठी राखून ठेवल्या होत्या. त्यामुळे अधिवेशन काळात निवास व्यवस्थेचा बोजवारा उडाला होता. तथापि गतवर्षी प्रशासनाने हॉटेल्स मधील सर्व खोल्या आरक्षित ठेवल्या होत्या. यंदाही 75 हॉटेलमधील सर्व 2009 खोल्या आरक्षित ठेवल्या जाणार आहेत. अधिवेशन सुरू होण्याआधी त्या हॉटेलची रंगरंगोटी अंतर्गत स्वच्छता तसेच सजावटीचे काम पूर्ण करण्याची सूचना देण्यात आली आहे. दरम्यान, डिसेंबर महिन्याच्या दुसऱ्या आठवड्यात अधिवेशन घेतले जाते.
त्यामुळे कांही हॉटेल मालकांनी डिसेंबरच्या पहिल्या आठवड्यात लग्न समारंभ तसेच अन्य कार्यक्रमांसाठी हॉल, लाॅन व खोल्या भाडेतत्त्वावर दिल्या होत्या. आगाऊ रक्कम घेऊन आरक्षणे केले होते. मात्र ते आता रद्द करण्यात आले असून हॉटेल मालकांनी संबंधितांना याची माहिती दिली आहे.
