बेळगाव लाईव्ह :बेळगाव महापालिकेने शहरात आणखी एक अतिरिक्त पार्किंग लॉट उभारण्याचा निर्णय घेतला आहे. यासाठी क्लब रोडवरील हॉटेल समोरील जागा निश्चित करण्यात आली आहे.
सदर ठिकाणी वाहनांसाठी पे अँड पार्क पार्किंगची सोय करण्याची सूचना जिल्हाधिकारी नितेश पाटील यांनी महापालिकेला केली आहे. याबरोबरच महापालिकेचा महसूल विभागाने देखील त्या अनुषंगाने प्रस्ताव तयार करण्यास सुरुवात केली आहे. सदर नियोजित पार्किंग लॉटच्या योजनेवर स्थायी समितीच्या बैठकीसह महापालिकेच्या सर्वसाधारण सभेत सखोल चर्चा होणार आहे.
जर या नव्या पार्किंग लॉटच्या प्रस्तावाला मंजुरी मिळाली तर त्याची त्वरित अंमलबजावणी केली जाणार आहे. तथापि क्लब रोडवर आणखी एक पार्किंग लॉट उभारण्यात कांहीच अर्थ नाही. कारण त्या ठिकाणी पूर्वीपासून ईफा हॉटेल समोर महापालिकेच्या मालकीचा पार्किंग लॉट आहे.
बेळगाव महापालिकेने शहरातील पार्किंग सुविधा वाढविण्यासाठी ठिकठिकाणी पार्किंग लॉट्स उभारण्याच्या दृष्टीने सध्या पुढाकार घेतला आहे.
