धर्मादाय खात्याने राज्यातील मंदिरांमध्ये मोबाईलच्या वापरावर बंदी घातली आहे. त्यामुळे यापुढे भक्तांना मंदिरात प्रवेश करण्यापूर्वी आपले मोबाईल स्विच ऑफ करावे लागणार आहेत.
धर्मादाय खात्याच्या आदेशानुसार मंदिरामध्ये प्रवेश करण्यापूर्वी भक्तांनी आपापले मोबाईल स्विच ऑफ करावयाचे आहेत. मंदिर परिसरात गाणी ऐकणे, रील तयार करणे, फोटो काढणे यावर निर्बंध घालण्यात आले आहेत.
धर्मादाय खात्याने काल सोमवारी यासंबंधीचा अधिकृत आदेश जारी केला आहे. सदर आदेशानुसार बेळगाव शहरातील सुप्रसिद्ध श्री कपिलेश्वर मंदिर, टिळकवाडी येथील साई मंदिर, अनगोळचे परमार्थ निकेतन श्री हरी मंदिर, समादेवी गल्लीतील श्री समादेवी मंदिर, वीरभद्र नगर येथील श्री वीरभद्र मंदिर तसेच पंत बाळेकुंद्री येथील श्री पंत महाराज मंदिर, सौंदत्तीचे श्री यल्लमा, मंदिर रायबाग तालुक्यातील चिंचली मायाक्का मंदिर, बडकुंद्री येथील श्री होळम्मा देवी मंदिर या मंदिरांमध्ये देखील आता भाविकांना मोबाईलचा वापर करता येणार नाही.
अलीकडेच तामिळनाडू आणि केदारनाथ येथे मंदिरात मोबाईल वापरावर निर्बंध घालण्यात आले आहेत. मंदिरांसारख्या पवित्र ठिकाणी शांत व भक्तीपूर्ण वातावरण निर्माण करण्याच्या उद्देशाने हे पाऊल उचलण्यात आले आहे.
मोबाईलच्या आवाजामुळे मनःपूर्वक देवदर्शन घेणाऱ्या भाविकांची एकाग्रता भंग होऊ नये यासाठी आता कर्नाटकातही तशी बंदी घालण्यात आली आहे. तेंव्हा यापुढे राज्यातील धर्मादाय खात्याच्या कार्यक्षेत्रात येणाऱ्या कोणत्याही मंदिरात किंवा ध्यान साधना केंद्रात प्रवेश करण्यापूर्वी सर्व भक्तांना आपले मोबाईल बंद करावे लागणार आहेत.
