बेळगाव लाईव्ह : कर्नाटक विधानसभा निवडणुकीनंतर आज बेळगाव महानगर पालिकेत सार्वजनिक बांधकाम विभागाचे मंत्री सतीश जारकीहोळी, महिला, बालकल्याण, अपंग आणि ज्येष्ठ नागरिक सबलीकरण विभागाच्या मंत्री लक्ष्मी हेब्बाळकर यांच्या प्रमुख नेतृत्वाखाली आज प्रगती आढावा बैठकीचे आयोजन करण्यात आले होते. विविध विषयांवरून गाजलेल्या या बैठकीत आज महाराष्ट्र एकीकरण समितीचे नगरसेवक रवी साळुंखे यांनी मराठीचा मुद्दा उपस्थित केला.
बैठकीच्या सुरुवातीलाच मागीलवेळी झालेल्या बैठकीत रवी साळुंखे यांनी बैठकीची विषयपत्रिका मराठी मध्येदेखील उपलब्ध करून देण्याची विनंती महापौरांकडे केली होती. पुढील बैठकीत मराठीतून विषय पत्रिका देण्यात येईल, असे आश्वासन महापौरांनी मागील बैठकीत दिले होते. त्यानंतर आज पुन्हा मनपा बैठक बोलाविण्यात आली.
मात्र आजदेखील मराठीतून विषयपत्रिका मिळाली नाही. बैठकीतील विविध विषयांवर चर्चा करताना अधिकारी आणि मंत्र्यांनी कन्नड भाषेत विषय पत्रिका वाचून दाखविली. ज्यावेळी शपथविधी होतो त्यावेळी मराठी, इंग्रजी आणि कन्नड अशा तिन्ही भाषेतून विषय पत्रिका दिली जाते मात्र बैठकीची विषय पत्रिका मराठीतून का दिली जात नाही? मराठी ऐवजी निदान हिंदी भाषेतून विषय पत्रिका पुरविण्यात यावी, अशी मागणी रवी साळुंखे यांनी केली.
यावेळी मंत्री सतीश जारकीहोळी यांच्याकडे सदर विषयाचा पाठपुरावा करून बैठकीची विषय पत्रिका मराठीतून देण्याची मागणी करण्यात आली. या मागणीला अनुसरून सतीश जारकीहोळी यांनी पुढील बैठकीत मराठीतून विषय पत्रिका पुरविण्यात येईल, असे आश्वासन दिले.
दरम्यान साळुंके यांनी नाथ पै सर्कल ते बसवेश्वर सर्कल दरम्यान नव्याने बांधण्यात आलेल्या भाजी विक्रेते मार्केटची उभारणी योग्य झाली असली तरी त्या ठिकाणी पार्किंगची स्वच्छता गृह आदी सोय नसल्याने ग्राहक जनतेचे हाल होणार आहे .स्थानिक जनतेला विश्वासात न घेता सदर मार्केट उभारणी झाली आहे त्यामुळे स्वतः मंत्र्यांनी स्थानिक जनतेशी संवाद साधावा मार्केट सुरू करण्या बाबत निर्णय घ्यावा अशी मागणी साळुंके यांनी केली.