बेळगाव लाईव्ह : सत्ता आणि पदाच्या आशेने राष्ट्रीय पक्षांच्या प्रवाहात गेलेल्या मराठी भाषिक नेत्यांना राष्ट्रीय पक्षांनी लाथाडले आहे. १० मे रोजी होऊ घातलेल्या कर्नाटक विधानसभा निवडणुकीसाठी भाजप पक्षाची उमेदवार यादी जाहीर झाली असून यामध्ये बेळगावमधील मराठा समाजातील नेत्यांना डावलण्यात आले आहे.
मराठा समाज आणि मराठी भाषिक नेत्यांना उमेदवारी नाकारल्याने मराठी भाषिकांचा द्वेष उफाळून आला आहे. आधीच कर्नाटक प्रशासन मराठी भाषिकांवर करत असलेले अन्याय आणि याउपरोक्त राष्ट्रीय पक्षांकडून मराठी भाषिकांचा केवळ निवडणुकीपुरता केलेला उपयोग या बाबी लक्षात घेत मराठी भाषिकांच्या भावना तीव्र झाल्या आहेत.
या पार्श्वभूमीवर बेळगाव मधील मराठी भाषिक एकवटत असून सोशल मीडियासह रस्त्यावर उतरून नागरिकांनी आंदोलन करण्यास सुरुवात केली आहे. भाजपने उमेदवार यादी जाहीर केल्यानंतर भाजपचे उमेदवार पाहता मध्यवर्ती महाराष्ट्र एकीकरण समितीकडे सुवर्णसंधी चालून आली आहे. महाराष्ट्र एकीकरण समितीला पुन्हा सोन्याचे दिवस येणार अशी आशा पल्लवित होत आहे. संपूर्ण सीमाभागातील मराठी भाषिक आपला हक्काचा उमेदवार निवडून आणण्यासाठी एकवटले असून आता नेत्यांनी शहाणपण जपण्याची गरज आहे.
बेळगावमधील खानापूर, ग्रामीण, दक्षिण आणि उत्तर मतदार संघात समितीचाच विजय होण्याची संधी स्वतःहून चालून आली असून सीमाभागात पुन्हा एकदा ‘निर्विवाद मराठी वर्चस्व’ प्रस्थापित होण्यासाठी एकजुटीने कामाला लागण्याची नितांत आवश्यकता आहे. गेल्या दोन निवडणुकीत समितीला पत्करावा लागलेला परभाव व्याजासहित वसूल करण्याची संधी मिळाली असून आता समिती नेत्यांनी आडमुठेपणा बाजूला सारून मराठीची वज्रमूठ आवळण्याची गरज येऊन ठेपली आहे.
आजपासून उमेदवारी अर्ज भरण्याच्या प्रक्रियेला सुरुवात होत असून निवडणुकीच्या दिवसासाठी काऊंटडाऊन सुरु झाले आहे. यामुळे राष्ट्रीय पक्षांना अस्मान दाखविण्यासाठी, निवडणुकीच्या आखाड्यात समितीने तगडे उमेदवार उतरवून, विजयाच्या दिशेने वाटचाल करण्यासाठी आणि विरोधकांना धूळ चारण्यासाठी, योग्य उमेदवाराची निवड करून पुन्हा एकदा समितीला गतवैभव प्राप्त करून देण्यासाठी कसोशीने प्रयत्न करणे आवश्यक आहे.
