काँग्रेस पक्षाचे राष्ट्रीय नेते राहुल गांधी यांच्या दौऱ्यामुळे वाहतूक पोलिसांकडून शहरातील रहदारी वेठीस धरण्यात आल्याचा प्रकार आज सोमवारी दुपारी घडल्यामुळे वाहनचालकांमध्ये तीव्र संताप व्यक्त होत होता.
काँग्रेस नेते राहुल गांधी यांची आज सोमवारी दुपारी सीपीएड कॉलेज मैदानावर जाहीर सभा होती. त्यानिमित्त त्यांचे बेळगावात आगमन होणार असल्यामुळे रहदारी पोलिसांकडून ते-जा करणाऱ्या मार्गावरील वाहतूक अन्यत्र वळविण्याबरोबरच अनेक ठिकाणी वाहतूक अडविण्यात आली होती.
परिणामी ठिकठिकाणी वाहतूक कोंडीची समस्या निर्माण होऊन वाहन चालकांना मनस्ताप सहन करावा लागला. राहुल गांधी यांची सभा सीपीएड मैदानावर असल्यामुळे त्या दिशेने जाणाऱ्या मार्गावरील सम्राट अशोक चौक, आरटीओ सर्कल आदी ठिकाणची वाहतूक वळविणे अथवा रोखली जाणे हे समजू शकण्यासारखे आहे.
मात्र तसे न घडता शहरात अन्यत्र ठीक ठिकाणी कांही काळ वाहतूक अडवून वाहन चालकांना वेठीस धरण्याचा प्रकार आज दुपारी घडला.
श्री बसवेश्वर सर्कल अर्थात गोवावेस या दूरवरच्या ठिकाणी बराच काळ वाहनांची अडवणूक करण्यात आल्यामुळे वाहनचालकात संतप्त प्रतिक्रिया व्यक्त होत होत्या.
