भारतीय जनता पक्षाच्या विचारधारेला अनुसरून गेली 20 वर्षे मी समाजसेवेसह पक्ष संघटना बळकट करण्यासाठी कार्यरत आहे. या खेरीज सकल मराठा समाजासह समस्त जनतेचा मला पाठिंबा असल्यामुळे मला उमेदवारी मिळाल्यास आगामी विधानसभा निवडणुकीत मी निश्चितपणे विजयी होईन, असा विश्वास भाजप राज्य ओबीसी युवा मोर्चाचे सचिव आणि सकल मराठा समाजाचे संयोजक किरण जाधव यांनी व्यक्त केला.
सकाळ मराठा समाज आणि भारतीय जनता पक्षातर्फे आज तिथीनुसार छ. शिवाजी महाराजांची जयंती साजरी करण्यात आली. यासाठी शहापूरच्या छ. शिवाजी उद्यानात जाऊन तेथील शिवछत्रपतींच्या मूर्तीचे किरण जाधव यांच्या नेतृत्वाखाली विधिवत पूजन करण्यात आले. या कार्यक्रमानंतर किरण जाधव प्रसार माध्यमांशी बोलत होते.
जाधव म्हणाले की गेल्या सुमारे 20 वर्षापासून मी भाजपचा निष्ठावंत कार्यकर्ता म्हणून कार्यरत आहे. भाजपच्या विचारधारेचे तंतोतंत पालन करत मी आजपर्यंत समाज सेवा करण्याबरोबरच पक्ष संघटना अधिक बळकट करण्यासाठी प्रयत्न केले आहेत आणि यापुढेही पक्ष संघटना आणि जनहितासाठीचे माझे प्रयत्न सुरूच राहणार आहेत. माझ्या कार्याची दखल घेत पक्षातर्फे मला गेल्या 2013 सालच्या निवडणुकीचे तिकीट देण्यात आले होते मात्र त्यावेळी आमच्या पक्षात फूट पडली असल्यामुळे दुर्दैवाने मी निवडून येऊ शकलो नाही. मात्र खचून न जाता बेळगाव दक्षिण मतदार संघातील माझे कार्य मी सुरूच ठेवले होते. या मतदारसंघात मराठा समाज बहुसंख्येने असून त्यांचे हित पाहणे हे मी माझे कर्तव्य समजतो.
सध्या बेळगाव दक्षिण मधील विद्यमान आमदार हे भाजपचे आहेत असे असताना आपण निवडणुकीसाठी उमेदवारी मिळण्याची अपेक्षा का बाळगता? या प्रश्नाला उत्तर देताना आपल्या देशात लोकशाही आहे. त्यामुळे कोणीही निवडणुकीसाठी उमेदवारी मागू शकतो. एखाद्याला उमेदवारी द्यायची की नाही हे पक्षाचे हाय कमांड ठरवणार. गुजरातमध्ये तर तब्बल जवळपास 50 विद्यमान आमदारांना बदलण्यात आले होते. शिवाय परवा भाजपचे ज्येष्ठ नेते माजी मुख्यमंत्री बी. एस. येडीयुरप्पा यांनी देखील आगामी विधानसभा निवडणुकीमध्ये उमेदवारी देताना कांही विद्यमान आमदारांना डावलले जाणार असे स्पष्टपणे सांगितले आहे.
आजपर्यंत केलेले निस्वार्थ कार्य आणि जनतेचा पाठिंबा याच्या पाठबळावर आगामी विधानसभा निवडणुकीमध्ये बेळगाव दक्षिण मतदार संघातून मराठा समाजासह सर्व समाजाला न्याय देण्यासाठी भाजपची उमेदवारी मला मिळावी यासाठी मी मराठा समाजाच्या स्वामीजींचा भाजप हाय कमांड, पक्षाचे वरिष्ठ नेते या सर्वांना विनंती केली आहे. आता निर्णय त्यांच्या हातात आहे मात्र जर मला भाजपची उमेदवारी मिळाली तर मी निश्चितपणे बहुमताने निवडून येईन, असा विश्वास किरण जाधव यांनी शेवटी व्यक्त केला.
