हैदराबाद -पणजी इकॉनॉमिक कॉरिडॉर प्रकल्पांतर्गत बेळगाव ते रायचूर हा चौपदरी 325 कि. मी. अंतराचा राष्ट्रीय महामार्ग बांधण्यात येणार आहे. सदर 12,500 कोटी रुपये खर्चाच्या महामार्गाचे बांधकाम 6 टप्प्यात पूर्ण केले जाईल.
सदर महामार्गाच्या कामासाठी भूसंपादनाची प्रक्रिया सुरू झाली आहे. हा 325 कि. मी. अंतराचा राष्ट्रीय महामार्ग व्हावा अशी मागणी मागील कित्येक दिवसांपासून होत होती. त्या अनुषंगाने केंद्रीय रस्ते वाहतूक आणि महामार्ग खात्याचे मंत्री नितीन गडकरी यांच्याकडे प्रस्तावही मांडण्यात आला होता. या प्रस्तावाला आता संपूर्ण मंजुरी मिळाली असून संबंधित लोकांच्या मागणीची पूर्तता झाली आहे. बेळगाव आणि रायचूर यांच्यामधील या चौपदरी राष्ट्रीय महामार्गामुळे भविष्यात या दोन्ही जिल्ह्यातील दळणवळणामध्ये सुधारणा होणार असून हा महामार्ग केंद्र सरकारच्या इकॉनॉमिक कॉरिडॉर प्रकल्पांतर्गत मंजूर करण्यात आला आहे.
बेळगाव जिल्ह्यात हा महामार्ग बस्तवाड, तारीहाळ, चंदनहोसुर, खमकारहट्टी आणि शगनमट्टी येथून जाणार आहे. नियोजित रायचूरपासून सुरू होणारा हा राष्ट्रीय महामार्ग बेळगाव -बागलकोट राज्य महामार्गाप्रमाणेच असणार असला तरी तो येरगट्टी येथून मुरगोड, इंचल, लक्कुंडी, बैलहोंगल, जक्कानाईकनकोप्प मार्गे वळविला जाईल. दरम्यान, मुख्यमंत्री बसवराज बोम्मई यांनी नुकतीच केंद्रीय मंत्री नितीन गडकरी यांची भेट घेऊन प्रलंबित रस्ते आणि प्रकल्पांबाबत चर्चा केली आहे.
