बेळगाव शहरातील पॅटसन कंपनीच्या मागील बाजूस असलेल्या रस्त्याची सध्या चिखलाची दलदल निर्माण होऊन अत्यंत दुरावस्था झाली असून सदर रस्त्याची तात्काळ डागडुजी करण्यात यावी, अशी जोरदार मागणी केली जात आहे.
पॅटसन कंपनीच्या मागील बाजूस असलेल्या रस्त्याचा नागरिकांकडून मोठ्या प्रमाणात वापर केला जातो. मात्र अलीकडच्या काळात या रस्त्याची दुरावस्था झाली आहे. आता पावसाळ्यामध्ये तर या रस्त्यावर सर्वत्र चिखलाची दलदल निर्माण झाली आहे.
त्यामुळे पादचाऱ्यांना चिखलातून मार्गक्रमण करताना मोठी कसरत करावी लागत आहे. या परिसरातच शाळा असून शाळेतील विद्यार्थ्यांना ने -आण करताना चिखलाच्या दलदलीमुळे पालकवर्गाला मोठा मनस्ताप होत आहे. सध्या या रस्त्यावर इतका चिखल निर्माण झाला आहे की दुचाकी वाहन चालवणे देखील धोकादायक बनले आहे.
तरी लोकप्रतिनिधींसह संबंधित वरिष्ठ अधिकाऱ्यांनी याकडे लक्ष देऊन पावसाचा जोर वाढण्यापूर्वी सदर रस्त्याची तात्काळ दुरुस्ती करावी, अशी मागणी या रस्त्याचा वापर करणाऱ्या नागरिकांकडून केली जात आहे.
