देशाच्या अमृत महोत्सवी स्वातंत्र्य वर्षानिमित्त ‘हर घर तिरंगा’ कार्यक्रमांतर्गत जिल्ह्यातील प्रत्येक घरासह सरकारी कार्यालय आणि इमारतींवर येत्या दि. 13 ते 15 ऑगस्ट असे सलग तीन दिवस तिरंगा ध्वज फडकविला जाईल, अशी माहिती जिल्हाधिकारी नितेश पाटील यांनी आज सोमवारी दिली.
आझादी का अमृत महोत्सवांतर्गत लोकांना आपापल्या घरांवर तिरंगा फडकविण्यासाठी प्रेरित करण्याच्या उद्देशाने ‘हर घर तिरंगा’ ही मोहीम राबवून भारतीय स्वातंत्र्याचे 75 वे वर्ष साजरे केले जाणार आहे.
आपल्या घरांवर फडकविण्यासाठी नागरिकांना अवघ्या 25 रुपयात राष्ट्रध्वज उपलब्ध करून दिला जाणार आहे. ‘हर घर तिरंगा’ या मोहिमेचा उद्देश जनतेमध्ये भारतीय राष्ट्रध्वजाबद्दल जनजागृती करणे आणि लोकांच्या हृदयात देशप्रेम जागृत करणे हा आहे.
जिल्हाधिकारी नितेश पाटील यांनी संबंधित अधिकाऱ्यांना शहर व जिल्ह्यातील घराघरात राष्ट्रध्वज पोहोचतील या अनुषंगाने कार्यवाही करण्याचे आदेश दिले आहेत. त्याचप्रमाणे जिल्ह्यातील सर्व जनतेसह सरकारी कर्मचारी, अंगणवाडी व आशा कार्यकर्त्यांनी आपापल्या घरांवर राष्ट्रध्वज फडकवून ‘हर घर तिरंगा’ कार्यक्रमात सहभागी व्हावे, असे आवाहन केले आहे.
नागरिकांना आपापल्या घरांवर ध्वज फडकविता यावेत यासाठी भारत सरकारने आपल्या ध्वज संहितेमध्ये कांही बदल देखील केले आहेत. यामुळे ध्वजारोहण सुलभ होणार असल्याचेही जिल्हाधिकारी पाटील यांनी स्पष्ट केले आहे.
