बेळगावातील फोर्ट रोडवर भर रस्त्यात भाजप नेत्या नूपुर शर्मा यांची फाशी दिलेल्या अवस्थेतील प्रतिकृती विजेच्या तारेवर टांगणाऱ्यांवर कठोर कारवाई करावी, अशी मागणी हमारा देश संघटनेने केली आहे.
हमारा देश संघटनेतर्फे आज मंगळवारी जिल्हाधिकारी कार्यालयासमोर निदर्शने करून उपरोक्त मागणीचे निवेदन जिल्हाधिकार्‍यांना सादर करण्यात आले. भाजप नेत्या नूपुर शर्मा यांनी मोहम्मद पैगंबर याविषयी अवमानकारक विधान केल्याचा आरोप करून त्यांची फाशी दिल्या अवस्थेतील प्रतिकृती विजेच्या तारांवर लटकवल्याची घटना फोर्ट रोडवर उघडकीस आली होती.
या घटनेचा हिंदुत्ववादी संघटनांनी जोरदार निषेध केला होता. या कृतीतून बेळगावातील शांतता बिघडवण्यात येत असल्याचा आरोप करून हमारा देश संघटनेने यात सहभागी असलेल्यांवर कठोर कारवाई करण्याची मागणी केली आहे.
जिल्हाधिकाऱ्यांना सादर करण्यात आलेल्या निवेदनात तशा आशयाचा तपशील नमूद आहे. जिल्हाधिकारी कार्यालया समोरील निदर्शनांमध्ये हमारा देश संघटनेचे अनेक स्त्री-पुरुष कार्यकर्ते सहभागी झाले होते.
