कोणताही धर्म टिकवायचा असेल तर संस्कृती टिकली पाहिजे, संस्कृती टिकवायची असेल तर भाषा टिकली पाहिजे आणि भाषा टिकवायची असेल तर आपलं अस्तित्व टिकवायला पाहिजे. हेच अस्तित्व टिकवण्यासाठी 27 रोजीच्या मराठी परिपत्रकाचा मोर्चात हजारोंच्या संख्येने मराठी जनतेने सहभागी व्हावे असे आवाहन तालुका महाराष्ट्र एकीकरण युवा आघाडीचे अध्यक्ष संतोष मंडलिक यांनी केले.
महाराष्ट्र एकीकरण समितीच्या वतीने दिनांक 27 जून रोजीच्या भव्य आणि विराट मोर्चा संदर्भात उचगाव येथील मध्यवर्ती गणेश मंदिरात जन जागृती करण्यासाठी आयोजित केलेल्या बैठकीत ते बोलत होते.बैठकीच्या अध्यक्षस्थानी बी एस होनगेकर होते.
मध्यवर्ती समितीचे अध्यक्ष दिपक दळवी, प्रकाश मरगाळे,तालुका समितीचे सरचिटणीस एम. जी पाटील, बाळासाहेब देसाई, दत्ता उघाडे, एल. वाय लाळगे,आंबेवाडी ग्राम पंचायत अध्यक्ष चेतन पाटील उचगाव ग्रामस्थ समिती नेते आदी उपस्थित होते.
कर्नाटक सरकारला जागे करण्यासाठी मराठी जनतेने या मोर्चात सहभागी होणे ही काळाची गरज बनली आहे असेही विचार यावेळी मांडण्यात आले.उचगाव मधील समितिनिष्ठ कार्यकर्ते उपस्थित होते.
बेळगाव तालुकाच नव्हे तर खानापूर तालुक्यात देखील मोर्चाची जनजागृती करण्यात येत आहे विशेषतः बेळगावचा ग्रामीण भागात मोर्चाची जनजागृती जोरात सुरू आहे.बेळगाव शहरात देखील बैठका घेऊन जनजागृती केली जाणार आहे.
