प्रलंबित खटले निकालात काढण्यासाठी बेळगावमध्ये आयोजित लोकअदालतीमध्ये तब्बल 12,537 खटले निकालात करण्यात आले. बेळगाव जिल्हा न्यायालयासह 14 तालुक्यातील न्यायालयांमध्ये निकालात काढण्यात आलेल्या या खटल्यांमुळे आतापर्यंतची सर्वात मोठी उलाढाल झाली असून विक्रमी 50 कोटी 11 लाख 63 हजार 54 रुपयांची देव-घेव झाली आहे.
बेळगाव जिल्ह्यात काल शनिवारी आयोजित राष्ट्रीय लोकअदालतीचे उद्घाटन मुख्य जिल्हा सत्र न्यायालयाचे न्यायाधीश सी. एम. जोशी यांच्या हस्ते करण्यात आले. या लोक अदालतीमध्ये एकूण 31,642 खटले दाखल करून घेण्यात आले होते. त्यामधील 12,537 खटले निकालात काढण्यात आले आहेत. सर्वच न्यायालयाच्या न्यायाधीशांनी हे खटले निकालात काढण्यासाठी प्रयत्न केले. वादी-प्रतिवादी यांना समोरासमोर घेऊन त्यांच्याशी चर्चा करून त्यानंतर हे खटले निकालात काढले गेले.
सदर लोकअदालतीमध्ये एनआय ॲक्ट अंतर्गत निकालात काढण्यात आलेल्या 904 खटल्यांद्वारे 17 कोटी 80 लाख 94 हजार 374 रुपयांची देव-घेव झाली आहे. एमएसीटी खटल्यात 5 कोटी 55 लाख 56 हजार 62 रुपयांची देवाण-घेवाण झाली आहे. त्याखालोखाल जमिनी संदर्भातील 133 खटले निकालात काढण्यात आले असून त्यामध्ये 2 कोटी 69 लाख रुपयांची देव-घेव झाली आहे.
यासह इतर खटल्यांमध्ये मोठ्या प्रमाणात उलाढाल झाली आहे. एकूणच या वेळच्या लोकअदालतीमुळे मोठ्या प्रमाणात खटले दाखल होण्याबरोबरच उलाढालही विक्रमी झाली आणि पक्षकारांनी प्रतिसादही उत्तम दिला. याप्रकारे संपूर्ण कर्नाटकात सर्वात जास्त खटले बेळगावच्या लोक अदालतीमध्ये निकालात काढण्यात आले आहेत.
