सेना दलाचे हेलिकॉप्टर क्रॅश होऊन घडलेल्या भीषण अपघातात सपत्नीक कालवश झालेले भारताचे पहिले चीफ ऑफ डिफेन्स स्टाफ (सीडीएस) बिपिन रावत यांचा बेळगावशी स्नेहपूर्ण संबंध होता. चीफ ऑफ आर्मी स्टाफ अर्थात लष्कर प्रमुख असताना दोन वेळा बेळगावच्या अधिकृत दौऱ्यावर आलेल्या रावत यांनी त्यावेळी आपल्या दिलखुलास उमद्या स्वभावाने लष्करी अधिकारी व जवानच नव्हे तर पत्रकारांची सुद्धा मने जिंकली होती.
तामिळनाडूमधील कुन्नूर येथे सेनादलाचे हेलिकॉप्टर कोसळून आज बुधवारी दुपारी घडलेल्या भीषण अपघातात सीडीएस बिपिन रावत व त्यांची पत्नी मधुलेखा रावत यांच्यासह अन्य 11 जण ठार झाले. या दुर्घटनेमुळे संपूर्ण देशावर शोककळा पसरली असून बिपिन रावत यांचे नांव पुन्हा चर्चेत आले आहे.
बेळगावला मराठा लाईट इन्फंट्री रेजिमेंटल सेंटरसह संरक्षण खात्याची अनेक कार्यालय आहेत. त्यामुळे संरक्षण खात्याच्या उच्चपदस्थ अधिकार्‍यांचा बेळगावशी वारंवार संबंध येत असतो. त्या अनुषंगाने सीडीएस बिपिन रावत यांचा बेळगावशी स्नेहपूर्ण संबंध होता.
लष्कर प्रमुख असताना यापूर्वी 2017 व 2018 साली दोन वेळा ते बेळगावच्या अधिकृत दौऱ्यावर आले होते. येथील मराठा लाईट इन्फंट्री रेजिमेंटल सेंटरच्या 3 नोव्हेंबर 2017 रोजी झालेल्या कार्यक्रमात सहभागी झालेल्या रावत यांनी त्यानंतर पुन्हा 31 ऑक्टोबर 2018 साली बेळगावला भेट दिली होती.
त्यावेळी मराठा सेंटरच्या 100 व्या शरकत दिन सोहळ्यात चीफ ऑफ आर्मी स्टाफ अर्थात लष्कर प्रमुख यानात्याने सहभागी होण्यासाठी आलेल्या बिपिन रावत यांनी मराठा इन्फंट्रीला शौर्याचा गौरवशाली इतिहास असून ही परंपरा कायम ठेवावी असे आवाहन प्रमुख पाहुणे या नात्याने बोलताना केले होते.
शरकत दिन सोहळ्याप्रसंगी रावत यांनी वरिष्ठ लष्करी अधिकारीच नव्हे तर जवानांचीही आपुलकीने चौकशी करून त्यांच्यासमवेत चहापान केले होते. यावेळी त्यांनी जवानांच्या कुटुंबीयांशी देखील आपुलकीने संवाद साधताना आपल्यातील माणुसकीचे आणि मोठ्या मनाचे दर्शन घडविले होते.
अत्यंत उच्चपदस्थ अधिकाऱ्यांचा पत्रकार परिषद वगळता पत्रकारांशी तसा फारसा संबंध येत नाही. मात्र शरकत दिन सोहळ्यात सहभागी झालेल्या लष्कर प्रमुख बिपिन रावत यांनी त्यावेळी बेळगावच्या पत्रकारांसोबत दिलखुलास संवाद साधला. त्यामुळे उमद्या स्वभावाचे सीडीएस बिपिन रावत आता बेळगाव येथील पत्रकारांच्या आठवणीत सदैव राहणार आहेत.
