कर्नाटकात दहावी परीक्षेत नापास झालेल्या त्या विद्यार्थ्याचीच चर्चा जास्त आहे. वेगळ्या पद्धतीने परीक्षा घेण्यात आली. सर्वांना पास होण्याची संधीही सरकारने दिली. तरीही नापास झालेला राज्यातील तो एकमेव विद्यार्थी कोण? याचा शोध घेण्याचा प्रयत्न बेळगाव live ने केला. आणि ही माहिती मिळाली आहे.
काल SSLC परीक्षेचा निकाल जाहीर झाला आणि य एक विद्यार्थी वगळता 99.99% विद्यार्थी उत्तीर्ण झाले. बंगळुर येथे पत्रकार परिषदेत नूतन शिक्षणमंत्री बी सी नागेश यांनी ही माहिती दिली. 4,70,160 विद्यार्थी उत्तीर्ण झाले आहेत.
2,50,317 विद्यार्थ्यांना A ग्रेड, 2,87,694 विद्यार्थ्यांना B ग्रेड आणि 1,1,610 विद्यार्थ्यांना C ग्रेड मिळाले. 157 विद्यार्थ्यांनी 625 पैकी 625 आणि दोन विद्यार्थ्यांनी 625 पैकी 622 गुण मिळवले.प्रत्यक्षात 4,70,161 विद्यार्थी परीक्षेला बसले होते आणि त्यापैकी तो एक विद्यार्थी अनुत्तीर्ण झाला. संबंधित विद्यार्थी मुलगा आहे की मुलगी? त्याला कोणत्या विषयात कमी गुण पडले? इतर विषयात त्याचे गुण किती? या सगळ्या गोष्टींचा धुरळा आता पडत आहे.
कर्नाटकातील दहावी अर्थात एस एस एल सी परीक्षेचा निकाल सोमवारी लागला . कर्नाटक प्राथमिक आणि माध्यमिक शिक्षण विभागाने तशी घोषणा केली होती. माजी शिक्षणमंत्री एस सुरेशकुमार यांच्या नेतृत्वाखाली परीक्षा झाली होती तर आता नूतन शिक्षणमंत्री बी सी नागेश यांनी निकाल जाहीर केला. यावेळी त्यांनी त्या नापास विद्यार्थ्याचा तपशील देणे कटाक्षाने टाळले आहे. त्याच्या मनावर परिणाम होऊ नये आणि त्याच्या पालकांनाही त्रास होऊ नये याची काळजी सरकार व शिक्षण मंत्रालयाने घेतली आहे.
हा निकाल सर्वप्रथम इंटरनेटच्या माध्यमातून देण्यात आलाय त्यानंतर तो शाळेतही मिळणार आहे.पण इतर आकडेवारी देताना नापास विद्यार्थ्याची ओळख देणे टाळण्यात आले आहे.
दहावीच्या मुलांना सक्षमपणे पुढील शिक्षण घेण्याची संधी मिळावी असा आग्रह माजी शिक्षणमंत्री सुरेशकुमार यांनी धरला होता, त्यामुळेच बहुपर्यायी प्रश्नांवर आधारित परीक्षा घेण्यात आली होती.
अनेक विद्यार्थी या प्रकारच्या परिक्षेलाही घाबरले होते. कोरोनाच्या या काळात झालेली ही परीक्षा तणावातच झाली. विद्यार्थ्यांचे लक्ष निकालाकडे लागून राहिले होते.निकालानंतर अपेक्षित टक्केवारी मिळाली नाही म्हणून अनेक विद्यार्थी नाराज झाले आहेत.
