स्टार एअर कंपनीने येत्या 22 एप्रिल 2021 पासून आठवड्यातील तीन दिवस बेळगाव ते तिरुपती मार्गावर आपली विमान सेवा सुरू करण्याचा निर्णय घेतला आहे. या निर्णयामुळे तिरुपती बालाजीच्या दर्शनासाठी जाणाऱ्या भक्तांची चांगली सोय होणार आहे.
ट्रू जेट कंपनीने यापूर्वीच बेळगाव ते तिरुपती ही विमानसेवा सुरू केली असताना आता त्यामध्ये स्टार एअरची भर पडली आहे. तिरुपती बालाजीच्या दर्शनासाठी दररोज हजारोंच्या संख्येने जाणाऱ्या भक्तांची सोय व्हावी यासाठी स्टार एअरने बेळगावमधून ही थेट विमान सेवा उपलब्ध करून दिली आहे. तसेच प्रवासाचा प्राथमिक तिकीट दर 2,499 रु. इतका ठेवला आहे. सदर विमानसेवा आठवड्यातील मंगळवार गुरुवार आणि शनिवार असे तीन दिवस उपलब्ध असणार असून यासाठी कंपनीने बुकिंगही सुरू केले आहे.
मंगळवार व गुरुवारी सकाळी 9:30 वाजता बेळगाव येथून प्रस्थान करणारे स्टार एअरचे विमान सकाळी 10:40 वाजता तिरुपतीला पोहोचणार आहे. तसेच सकाळी 11:10 वाजता तिरुपती येथून निघालेले विमान दुपारी 12:20 वाजता बेळगावला पोहोचणार आहे.
शनिवारी विमानसेवेच्या वेळापत्रकात थोडा बदल असणार आहे. या दिवशी दुपारी 2:20 वाजता बेळगाव येथून निघालेले विमान दुपारी 3:30 वाजता तिरुपतीला पोहोचणार आहे आणि दुपारी 4 वाजता तिरुपती येथून निघालेले विमान सायंकाळी 5:10 वाजता बेळगावला पोहोचणार आहे. या पद्धतीने आठवड्यातील तीन दिवस ही विमानसेवा सुरू करण्यात येणार असल्याने प्रवाशांची चांगली सोय होणार आहे.
