बेळगाव शहर स्मार्ट सिटीमध्ये दाखल झाल्यानंतर विकासकामांना सुरुवात झाली खरी परंतु सातत्याने या कामकाजात या ना त्या कारणाने अनेक अडथळे निर्माण होत आहेत. कधी रस्त्यांचे काम अपूर्ण अवस्थेत तर कधी गटारी बांधकामांचे काम अपूर्ण अवस्थेत, काही ठिकाणी तर रस्त्यांचे कामकाज हे चुकीच्या पद्धतीने झाले आहे. शहरात गॅस पाइपलाइनचे कामकाज सुरु आहे. परंतु या कामकाजातही वारंवार दुर्घटना घडत आहेत. अनेक ठिकाणी विकासकामांतर्गत सुरु असलेल्या रस्ते कामकाजातील जेसीबीमुळे गॅस वाहिनीला तडा जाऊन गळती झाल्याचे प्रकार सामोरे येत आहेत. सुदैवाने यात आजपर्यंत कोणतीही जीवितहानी झाली नाही. परंतु सातत्याने होत असलेल्या या घटनांमुळे कोणाचा नाहक बळी जायची वाट प्रशासन पाहत आहे का? असा प्रश्न उपस्थित होत आहे.
आज डॉ. बाबासाहेब आंबेडकर येथे घालण्यात येत असलेल्या गॅस पाइपलाइनला जेसीबीमुळे तडा जाऊन मोठ्या प्रमाणात गॅस गळती झाली आहे. वेळीच अग्निशमन दलाला पाचारण करण्यात आल्यामुळे हि गॅस गळती रोखण्यात यश आले असून सुदैवाने कोणतीही जीवितहानी झाली नाही.
शहरात स्मार्ट सिटी अंतर्गत होत असलेल्या कामकाजासाठी जेसीबीद्वारे खोदकाम करण्यात येत आहे. परंतु संबंधित जेसीबी कंत्राटदाराकडून सातत्याने गॅस पाइपलाइनकडे दुर्लक्ष होत असून पाइपलाइनला तडा जाऊन मोठ्या प्रमाणावर गॅस गळती होत आहे. यासंबंधी अनेकवेळा जेसीबी कंत्राटदाराला सांगण्यात आले आहे आणि लेखीही कळविण्यात आले आहे.
यासंबंधी ८ जुलै रोजी अनिल बेनके यांची भेट घेऊन कंत्राटदारांची समन्वय समिती स्थापन करण्याची चर्चाही करण्यात आली आहे. परंतु कोरोनामुळे काहीजणांना क्वारंटाईन करण्यात आल्यामुळे हि प्रक्रिया थांबली आहे. तसेच कार्यकारी संचालक शशिधर कुरेर यांचीही भेट घेऊन कंत्राटदारांची समानव्य समिती स्थापन करण्याची विनंती करण्यात येणार आहे.
जेसीबीद्वारे खोदकाम करण्यात येत असलेले कामकाज हेही स्मार्ट सिटीचाच एक भाग आहे. परंतु जेसीबी कंत्राटदारांना सांगूनही सातत्याने असे प्रकार घडत आहेत. कोणताही मोठा अनर्थ होऊ नये यासाठी आता कायदेशीर कारवाई करून नोटीस बजावण्यात येणार असल्याची माहिती गॅस कंपनीच्या कंत्राटदारांनी “बेळगाव लाईव्ह” ला दिली आहे.
