बेळगाव लाईव्ह : बेळगाव जिल्हा रुग्णालयाच्या प्रसूती विभागात गुरुवारी दुपारी ३.०० च्या सुमारास एका बाळंतिणीचा मृत्यू झाला आहे. पूजा आडव्याप्या कड्कभावी (वय २५, रा. कुंदरगी, ता. गोकाक) असे सदर महिलेचे नाव आहे.
एकीकडे नातेवाईकांकडून डॉक्टरांच्या दुर्लक्षामुळे मृत्यू झाल्याचा आरोप होत असताना बाळंतिणीच्या हृदयाचे ठोके वाढल्याने तिला श्वसनाचा त्रास झाल्याचे स्पष्टीकरण डॉक्टरांनी दिले. नवजात बालकाची प्रकृतीही चिंताजनक असल्याची माहिती डॉक्टरांनी प्रसारमाध्यमांना दिली आहे.
राज्यात विविध ठिकाणी सरकारी रुग्णालयात बाळंतिणीच्या मृत्यूच्या घटना वाढत असतानाच बेळगावमधील जिल्हा रुग्णालयात बाळंतिणीच्या मृत्यूची महिन्याभरातील ही तिसरी घटना आहे.
सदर महिलेने बुधवारी एका मुलाला जन्म दिला. महिलेची ही चौथी प्रसूती होती. याआधी तिने तीन मुलींना जन्म दिला आहे. प्रसूतीची तिची हि चौथी वेळ होती. यादरम्यान तिची प्रकृती खालावली. उपचाराआधीच ती बेशुद्ध पडली होती.
श्वसनाचा त्रास वाढल्याने तिचा मृत्यू झाल्याचे डॉक्टरांनी सांगितले. मात्र शवविच्छेदन न करताच मृतदेह घाईघाईने पाठवण्यात आल्याचा आरोप नातेवाईकांनी केला असून याप्रकरणी एपीएमसी पोलीस ठाण्यात नोंद करण्यात आली आहे.