बेळगाव लाईव्ह :राज्य सरकारने विधानसभेचे हिवाळी अधिवेशन येत्या 9 ते 20 डिसेंबर दरम्यान सुवर्ण विधान सौध बेळगाव येथे होणार असल्याची घोषणा केली आहे. अधिवेशन बोलावण्यासंबंधीचा प्रस्ताव मंजुरीसाठी राज्यपाल थावरचंद गेहलोत यांच्याकडे पाठवण्यात आल्याची पुष्टी कायदा आणि संसदीय कामकाज मंत्रालयाने केली आहे.
एक ऐतिहासिक टप्पा म्हणून यंदा सरकार गत 26 व 27 डिसेंबर 1924 रोजी बेळगाव येथे झालेल्या 39 व्या काँग्रेस अधिवेशनातील महात्मा गांधींच्या भाषणाला 100 वर्षे पूर्ण झाल्याच्या स्मरणार्थ कार्यक्रमांचे आयोजन करत आहे.
या वर्षी त्याच तारखांना बेळगाव येथे काँग्रेसचे अधिवेशन होणार आहे. विधानसभेचे अध्यक्ष यू. टी. खादर आणि विधान परिषदेचे अध्यक्ष बसवराज होराट्टी यांनी हिवाळी अधिवेशन आणि स्मरणार्थ कार्यक्रम सुरळीत पार पाडण्यासाठी नुकतीच अधिकाऱ्यांसोबत पूर्वतयारी बैठक घेतली.
पत्रकार परिषदेत यू. टी. खादर यांनी या अधिवेशनासाठी आमदारांच्या मोठ्या उपस्थितीचे महत्त्व स्पष्ट केले. यावेळी उत्तर कर्नाटकातील महत्त्वाच्या प्रश्नांवर चर्चा करण्यासाठी प्राधान्याने वेळ दिला जाईल, असे आश्वासन त्यांनी दिले. “मागील अधिवेशनात, वादविवादांमध्ये आमदारांचा सहभाग वाखाणण्याजोगा होता आणि आम्हाला यावेळीही अशाच सहभागाची अपेक्षा आहे,” ते म्हणाले. अधिवेशनादरम्यान सुवर्ण विधान सौधला भेट देणाऱ्या विद्यार्थ्यांना अनुभव समृद्ध करण्यासाठी सरकार विशेष जागृती कार्यक्रम आयोजित करत आहे.
मंत्री, आमदार आणि ड्रायव्हर, पोलीस कर्मचारी आणि अधिकारी यांच्यासारख्या सपोर्ट स्टाफसाठी निवास, जेवण, पाणी आणि अल्पोपाहार यासह निर्बाधीत व्यवस्था सुनिश्चित करण्याची गरज विधानसभा अध्यक्ष खादर यांनी अधोरेखित केली.
आंदोलन स्थळांवर कारवाईमध्ये व्यत्यय न आणता निदर्शकांना सामावून घेण्यासाठी पुरेशा सुविधा देखील उपलब्ध करून दिल्या जातील, असेही त्यांनी सांगितले.