बेळगाव लाईव्ह:इंडियन मेडिकल असोसिएशनने (आयएमए) कोलकाता येथील आर. जी. कार मेडिकल कॉलेज आणि हॉस्पिटलमध्ये झालेल्या क्रूर बलात्कार आणि हत्येच्या निषेधार्थ देशभरातील आधुनिक औषधोपचार करणाऱ्या डॉक्टरांच्या सेवा 24 तासांसाठी मागे घेण्याच्या स्वरूपात देशव्यापी संप पुकारण्याची घोषणा केली आहे.
सदर आंदोलन उद्या शनिवार दि. 17 रोजी सकाळी 6 वा. प्रारंभ होऊन रविवार दि.18 ऑगस्ट रोजी सकाळी 6 वा. समाप्त होईल.
बेळगाव आयएमएने एका प्रसिद्धी पत्रकाद्वारे या संपाला पाठिंबा दर्शवला असून आंदोलनाच्या कालावधीत सर्व आपत्कालीन सेवा वगळता ते आपल्या इतर सेवा 24 तासांसाठी मागे घेतील. सेवा कार्यरत राहतील. कोलकाता येथील आर. जी. कार मेडिकल कॉलेजमध्ये गेल्या 9 ऑगस्ट 2024 रोजी एका तरुण महिला डॉक्टरवर क्रूरपणे बलात्कार करून तिची हत्या करण्यात आली होती.
कलकत्ताच्या उच्च न्यायालयाने नमूद केल्याप्रमाणे पुरावे नष्ट करण्याचा प्रयत्न करून अधिकाऱ्यांनी परिस्थिती आणखीनच बिघडवली असून हे अत्यंत धक्कादायक आहे. इतर डॉक्टर जे त्यांच्या सहकाऱ्याला न्याय मिळवून देण्यासाठी शांततापूर्ण आंदोलन करत होते. त्यांना अचानक अंगावर धावणाऱ्या जमावाच्या रागाचा सामना करावा लागला. त्यामुळे स्वतःला वाचवण्यासाठी त्यांना धावाधाव करावी लागली. त्यामध्ये बरेच जण पुन्हा जखमी झाले. संतप्त जमावाने आपला हल्ला सुरूच ठेवून गुन्ह्याच्या ठिकाणी तोडफोड केली.
या पद्धतीने शारीरिक हल्ले आणि गुन्हे हे डॉक्टर, परिचारिका आणि इतर आरोग्य कर्मचारी यांच्या बाबतीतील सरकारच्या उदासीनता आणि असंवेदनशीलतेचा परिणाम आहेत. या घटनांची साखळी, अधिकाऱ्यांची उदासीनता आणि वारंवार बळी पडणे आणि अपमानित होणे लक्षात घेऊन आम्ही इंडियन मेडिकल असोसिएशनच्या डॉक्टरांनी बेळगाव येथे दि. 17 ऑगस्ट रोजी सकाळी 6 ते दि. 17 ऑगस्ट रोजी सकाळी 6 वाजेपर्यंत अत्यावश्यक सेवा मागे घेण्याचे घोषित केले आहे.
आयएमएचे याच्यासाठी प्रयत्न (मागण्या) : 1) आमच्या सहकाऱ्यासाठी जलद न्याय, 2) सुरक्षित कामाचे वातावरण, 3) अशा घटनांना कठोरपणे न्याय देणारा कायदा. टीप : सर्व आपत्कालीन सेवा कार्यरत राहतील. मात्र नियमित ओपीडी आणि वैकल्पिक शस्त्रक्रिया उपलब्ध नसतील.
