बेळगाव लाईव्ह : इंग्रजी शाळेत शिकलं तरच जीवनात यश मिळता येत असं कांही नाही, मराठी शाळेमध्ये शिकून देखील जीवनात मोठं होता येत आणि म्हणूनच पालकांनी आपल्या मुलांना मराठी माध्यमाच्या शाळेतून आपल्या मातृभाषेत शिक्षण घेण्यास प्रोत्साहित करावे, असे आवाहन अभियंता जगदीश पाटील यांनी केले.
मराठा मंडळ संस्थेच्या सेंट्रल हायस्कूल शाळेमध्ये 1987 -88 सालच्या माजी विद्यार्थ्यांतर्फे आज बुधवारी सकाळी आयोजित गुरुवंदना आणि वन महोत्सव कार्यक्रम उत्साहात पार पडला. याप्रसंगी अभियंता जगदीश पाटील बोलत होते.
आपल्या मुलांना मराठी शाळेमध्ये शिकण्यास प्रोत्साहित करावे. त्यांचे शालेय शिक्षण मातृभाषेत होईल असे पहावे. आपण आपली मराठी भाषेचे संगोपन आणि संवर्धन केले पाहिजे. जीवनात यश, प्रगती साधायची असेल तर कष्ट करण्याची तयारी तसेच जिद्द आणि इच्छाशक्ती असणे गरजेचे आहे. सर्वात महत्त्वाचे म्हणजे तुम्ही तुमचे आरोग्य तंदुरुस्त निरोगी ठेवले पाहिजे, असेही पाटील यांनी स्पष्ट केले
अमेरिकेतील 22 वर्षाच्या वास्तव्यानंतर मी अलीकडे चार वर्षांपूर्वी मायदेशी बेळगावला परत आलो आहे. येथे आल्यानंतर मी आपल्या समाजासाठी कांहीतरी करावे यासाठी कृषी क्षेत्रा करीता काम करण्याचं ठरवलं. त्या अनुषंगाने मी माझी स्वतःची कंपनी स्थापन केली आहे.
अलीकडच्या काळात रासायनिक शेतीचे प्रमाण वाढले आहे. या पार्श्वभूमीवर नैसर्गिक अशा सेंद्रिय शेतीवर भर देऊन मी माझ्या कंपनीच्या माध्यमातून शेतकऱ्यांना मार्गदर्शन करत आहे, अशी माहितीही अभियंता जगदीश पाटील यांनी दिली.
