सिमेंट भरलेल्या भरधाव टिप्परने रस्त्यावर थांबलेल्या कार गाडीला जोरदार धडक दिल्याने घडलेल्या भीषण अपघातात दोन महिलांसह एक बालिका ठार तर अन्य एक महिला गंभीर जखमी झाल्याची घटना गोकाक नजीकच्या हल्लुर (ता. मुडलगी) येथे काल रात्री घडली.
शांतव्वा भागोडी (वय 50) दुंडव्वा उळागड्डी (वय 60) व लक्ष्मी भागोडी (वय 5) अशी अपघात मृत्युमुखी पडलेल्यांची नांवे आहेत. त्याचप्रमाणे सुनंदा भागोडी (वय 50) ही महिला गंभीर जखमी झाली असून तिला उपचारासाठी इस्पितळात दाखल करण्यात आले आहे.
अपघातग्रस्त सर्वजण हल्लूर (ता. मुडलगी) येथील रहिवासी आहेत हल्लूर येथील बागडी कुटुंबात घरगुती कार्यक्रम आयोजित करण्यात आला होता. यासाठी शेतवाडीत काल रात्री जाऊन स्वयंपाक करून 2:30 च्या सुमारास घरी परतत असताना मुधोळ -निपाणी रस्त्यावरील हल्लूर गुबी बसस्थानकासमोर कारचालक कार थांबवून खाली उतरला.
यावेळी यादवाडहून पुण्याकडे सिमेंट भरून जाणाऱ्या भरधाव टिप्परने (क्र. एमएच 12 एनएच 7010) कारला जोराची धडक दिल्यामुळे कारमधील सुनंदा या जागीच ठार झाल्या तर अन्य दोघांचे उपचारासाठी गोकाकला नेत असताना वाटेतच निधन झाले.
मुडलगी पोलीस स्थानकात अपघाताची नोंद झाली असून टिप्पर चालक प्रकाश भीमराव खांडेकर (वय 35, रा. कर्वे रोड, पुणे -महाराष्ट्र) याला ताब्यात घेण्यात आले आहे.
