अनगोळ पशु चिकित्सालयाची दुरवस्था दूर करण्याची मागणी

अनगोळ येथील सरकारी पशुचिकित्सालयाची अत्यंत दुरवस्था झाली असून याकडे संबंधित वरिष्ठ अधिकाऱ्यांनी गांभीर्याने लक्ष देण्याची मागणी होत आहे.

अनगोळ परिसरातील पशु पालकांच्या सोयीसाठी संत मीरा रोड अनगोळ येथे सरकारी पशु चिकित्सालय आहे. गेल्या अनेक वर्षापासून हे पशुचिकित्सालय याठिकाणी असले तरी त्याच्या देखभालीकडे साफ दुर्लक्ष करण्यात आले आहे.

चिकित्सलयाची इमारत करण्यात आल्यानंतर आजतागायत या इमारतीचे रंग काम करण्यात आलेले नाही. त्यामुळे भकास वाटणार्‍या या इमारतीच्या खिडक्यांची तावदाने व्यवस्थित नाहीत. वेळच्यावेळी साफसफाई होत नसल्यामुळे पशुचिकित्सालय आवारात अस्वच्छता निर्माण झालेली आहे.

आवारात मलमूत्र विसर्जन केले जात असल्यामुळे दुर्गंधीचे वातावरण पसरलेले असते. गेल्या बऱ्याच वर्षापासून साधे फडके अथवा झाडू ही मारण्यात न आल्यामुळे पशु चिकित्सालयाचा नामफलक धुळीने माखून गेला आहे.

तरी संबंधित वरिष्ठ अधिकाऱ्यांनी याकडे गांभीर्याने लक्ष देऊन लवकरात लवकर या पशू चिकित्सालयाची दुरुस्ती, साफसफाई आणि रंगरंगोटी करावी अशी मागणी केली जात आहे.