मनगुत्ती (ता. हुक्केरी) येथे छ. शिवाजी महाराजांचा नियोजित पुतळा उभारण्याच्या वादावर तोडगा काढण्यात आला असून गावकऱ्यांच्या मागणीवरुन एकाच ठिकाणी छ. शिवाजी महाराज आणि महर्षी वाल्मिकी यांचे पुतळे उभारण्यात येणार आहेत. यासाठी गावातील बस स्थानकानजीकच्या नियोजित ठिकाणी आज गुरुवारी चबुतरा बांधकामाचा शुभारंभ करण्यात आला.
मनगुत्ती (ता. हुक्केरी) गावातील छ. शिवाजी महाराजांची मूर्ती चबूतऱ्यावरून उतरवल्याच्या घटनेने अलीकडेच मोठा वाद निर्माण झाला होता. या वादाचे पडसाद महाराष्ट्रातही उमटले होते. तथापि गेल्या सोमवारी नाशिकहुन आलेल्या शिवसैनिकांनी मनगुत्ती गावाला छत्रपती शिवरायांची 4 फूट उंचीची मूर्ती भेट देऊन शिवरायांचा आदर करा असे सूचित केले आहे.
दरम्यान गेल्या मंगळवारी आमदार सतीश जारकीहोळी यांनी म्हणून मनगुत्ती गावाला भेट देऊन स्थानकानजीकच्या जागेसंदर्भातील वाद मिटविला आणि चबूतऱ्यासाठी पुन्हा बस स्थानकाचे शेड काढण्याच्या कामाला गती दिली होती. त्यानंतर आज आमदार जारकीहोळी यांच्या उपस्थित चबुतरा निर्माण करण्याच्या कामाचा शुभारंभ करण्यात आला.
चबूतऱ्याचे काम पूर्ण होताच याठिकाणी शुभमुहूर्तावर छ. शिवाजी महाराज आणि महर्षी वाल्मिकी यांचा पुतळा उभारण्यात येणार आहे. कायदा आणि सुव्यवस्था पुन्हा भंग होऊ नये यासाठी सध्या मनगुत्ती गावात राखीव पोलीस दलाच्या दोन तुकड्या तैनात करण्यात आल्या आहेत. दरम्यान शिवरायांचा पुतळा उभारणीच्या कामाचा शुभारंभ झाल्यामुळे शिवप्रेमीमध्ये समाधान व्यक्त होत आहे.
