उप नोंदणी कार्यालयातून नोंद झालेले खरेदीपत्रच गहाळ झाल्याने उप नोंदणी कार्यालयाचा सावळा गोंधळ पुन्हा एकदा चव्हाट्यावर आला आहे.आता हे खरेदीपत्र हरवले की चोरीला गेले याचा तपास पोलीस खाते करत आहे.या साऱ्या प्रकरणामुळे गुरुवारी संपूर्ण दिवस मात्र उप नोंदणी
कार्यालयाचे कामकाज ठप्प झाले होते.
महत्वाची कागदपत्रे वगैरे पाहिजे असणाऱ्या व्यक्तीची आणि खरेदी विक्रीसाठी मुहूर्त ठरवलेल्या व्यक्तींची मात्र गैरसोय तर झालीच शिवाय आर्थिक भुर्दंडही पडला.
उप नोंदणी कार्यालय म्हणजे सरकारी कार्यालयातील सावळा गोंधळ ,भ्रष्ट कारभार,मुजोर कर्मचारी आणि माजलेले एजंट यांचे उत्तम उदाहरण म्हणावे लागेल.आजवर पैसे घेऊन कामे केली जातात,पती पत्नी नसताना देखील विवाह नोंदणी प्रमाणपत्र दिले जाते इथपर्यंत उप नोंदणी कार्यालयाची माहिती होती पण आता चक्क सुपारी घेऊन नोंद झालेली खरेदीपत्र गायब करण्याचे प्रकार या कार्यालयात घडत आहेत.
वकील मोहन मोहिते यांनी आपल्या पक्षकाराचे एक खरेदीपत्र नोंद करण्यासाठी उप नोंदणी कार्यालयात नंबर लावला होता.दोन तीन वेळा हेलपाटे मारायला लावल्यावर संतप्त मोहिते वकिलांनी सब राजिस्त्ररला धारेवर धरले मग त्यांना वेळ देण्यात आली.मोहिते वकील यांच्या पक्षकार महिला पुण्याहून आल्या होत्या.त्यांनी तेथे सही करून,फोटो काढून अंगाठेही दिले.
सगळी खरेदीपत्राची प्रक्रिया पूर्ण झाल्यावर साहेबांच्या सही,शिक्क्यासाठी शिपायाने खरेदीपत्र घेतले.नंतर काही वेळाने आल्यावर मोहिते वकिलांनी खरेदीपत्र मागितले.त्यावेळी खरेदी पत्र चक्क चोरीला गेल्याचे ध्यानात आले.नंतर त्यांनी अधिकारी,कर्मचाऱ्यांची खरडपट्टी काढल्यावर सब रजिस्ट्रारने आपण पुण्याला जाऊन त्या महिलेची सही करून आणतो आणि नवे खरेदीपत्र करून देतो म्हणून गयावया करू लागला आहे.
