बेळगाव लाईव्ह : कर्नाटक शालेय परीक्षा आणि मूल्यमापन मंडळाच्यावतीने घेण्यात येणाऱ्या बारावीच्या (द्वितीय पीयूसी) वार्षिक परीक्षेला आज, २८ फेब्रुवारी २०२६ पासून राज्यभरात शांततेत सुरुवात झाली. परीक्षेच्या पहिल्या दिवशी सकाळी भाषा विषयांचे पेपर पार पडले.
बेळगाव जिल्ह्यातून यावर्षी एकूण ५१,९३८ विद्यार्थ्यांनी परीक्षेसाठी नोंदणी केली असून यामध्ये बेळगाव शैक्षणिक विभागातील २२,४११ आणि चिक्कोडी शैक्षणिक विभागातील २९,५२७ विद्यार्थ्यांचा समावेश आहे. संपूर्ण जिल्ह्यात एकूण ९५ परीक्षा केंद्रांवर ही प्रक्रिया राबवली जात असून, खबरदारीचा उपाय म्हणून सर्व केंद्रांच्या २०० मीटर परिसरात प्रशासनाने प्रतिबंधात्मक आदेश लागू केले आहेत.
बेळगाव शहरातील प्रमुख परीक्षा केंद्रांवर सकाळपासूनच विद्यार्थ्यांची वर्दळ दिसून आली, तर ग्रामीण भागातील विद्यार्थ्यांसाठी वायव्य कर्नाटक परिवहन मंडळाने विनामूल्य बस प्रवासाची सोय उपलब्ध करून दिली होती. सर्व केंद्रांवर सीसीटीव्ही कॅमेऱ्यांच्या माध्यमातून कडक देखरेख ठेवली जात असून, भरारी पथकांद्वारे अचानक तपासणी केली जात आहे.
परीक्षेच्या पहिल्या दिवशी भाषा विषयांचे पेपर असल्याने विद्यार्थ्यांमध्ये उत्साह पाहायला मिळाला. ही वार्षिक परीक्षा १७ मार्च २०२६ पर्यंत चालणार आहे. यानंतर २ मार्च रोजी भूगोल, सांख्यिकी (Statistics) आणि मानसशास्त्र या विषयांची परीक्षा होणार असून, ३ मार्च रोजी इंग्रजी या अनिवार्य विषयाचा पेपर घेतला जाईल. ४ मार्च रोजी तमिळ, तेलगू, मल्याळम, मराठी, उर्दू, संस्कृत आणि फ्रेंच या प्रादेशिक व परदेशी भाषांचे पेपर नियोजित आहेत. परीक्षेच्या दुसऱ्या आठवड्यात ५ मार्चला इतिहास, ६ मार्चला भौतिकशास्त्र (Physics) आणि ७ मार्चला ऐच्छिक कन्नड, व्यावसायिक अभ्यास (Business Studies) आणि भूविज्ञान या विषयांच्या परीक्षा होतील.
९ मार्च रोजी रसायनशास्त्र (Chemistry), शिक्षणशास्त्र आणि बेसिक मॅथ्सचे पेपर पार पडल्यानंतर १० मार्चला अर्थशास्त्र आणि ११ मार्चला लॉजिक, जीवशास्त्र (Biology), इलेक्ट्रॉनिक्स आणि गृहविज्ञान या विषयांची परीक्षा घेतली जाईल. १२ मार्च रोजी हिंदी, तर १३ मार्चला राज्यशास्त्र (Political Science) विषयाचा पेपर होईल. परीक्षेच्या अंतिम टप्प्यात १४ मार्चला अकाउंटन्सी आणि गणित या महत्त्वाच्या विषयांचे पेपर असून १६ मार्चला समाजशास्त्र, जीवशास्त्र आणि संगणकशास्त्र (Computer Science) या विषयांची परीक्षा होईल.
या संपूर्ण सत्राचा समारोप १७ मार्च २०२६ रोजी हिंदुस्तानी संगीत, माहिती तंत्रज्ञान (IT), रिटेल, ऑटोमोबाईल, हेल्थ केअर आणि ब्युटी अँड वेलनेस यांसारख्या व्यावसायिक आणि तांत्रिक विषयांच्या पेपरने होणार आहे.
