बेळगाव लाईव्ह :कवडी पीर मोहरम मिरवणुकीनंतर दोन गटात झालेल्या भांडणाचे पर्यवसान एका अल्पवयीन मुलाला तलवारीला हल्ला करून गंभीर जखमी करण्यात आल्याची घटना काल रात्री शहरातील मार्केट पोलीस ठाण्याच्या व्याप्तीतील कसाई गल्ली परिसरात घडली.
जखमी मुलाचे नांव रेहान अस्लम मुजावर (वय 16, रा. न्यू गांधीनगर, बेळगाव) असे आहे. दरवर्षी मोहरम सणानिमित्त कवडी पीर मिरवणूक काढण्याची परंपरा आहे, ज्यामध्ये प्रामुख्याने अल्पवयीन मुलांचा सहभाग असतो. मिळालेल्या माहितीनुसार काल शुक्रवारी रात्री शहरात कवडी पीर मोहरम मिरवणूक काढण्यात आली होती.
या मिरवणुकीची सांगता झाल्यानंतर काही कारणावरून मिरवणुकीत सहभागी दोन गटांमध्ये कसाई गल्ली परिसरात भांडण होऊन त्याचे पर्यवसान रेहान याच्यावर तलवारीने हल्ला करण्यामध्ये झाले. हे भांडण व हल्ल्याची घटना पूर्ववैमनस्यातून घडल्याचा कयास आहे.
तलवार हल्ल्यात रेहान याच्या डाव्या खांद्याच्या मागे आणि डोक्याला तलवारीचे वार बसल्यामुळे तो गंभीर जखमी झाला असून उपचारासाठी त्याला बिम्स अर्थात सिव्हिल हॉस्पिटलमध्ये दाखल करण्यात आले आहे.
सदर हल्ल्याची माहिती मिळताच शहर पोलीस आयुक्त भूषण गुलाबराव बोरसे आणि पोलीस उपायुक्त नारायण बरमनी यांनी काल रातोरात घटनास्थळी भेट देऊन पाहणी केली. त्याचप्रमाणे सिव्हिल हॉस्पिटलमध्ये जाऊन जखमी रेहान याची विचारपूस करून हल्ल्याबाबत माहिती जाणून घेतली.
त्यानंतर शहर पोलीस आयुक्त भूषण बोरसे यांनी प्रसिद्ध माध्यमांना वरीलप्रमाणे घटनेची माहिती देण्याबरोबरच यासंदर्भात तपास कार्य हाती घेण्यात आले असून हल्लेखोरांना त्वरित गजाआड केले जाईल असे स्पष्ट केले.