बेळगाव लाईव्ह : एकेकाळी स्मार्ट सिटी प्रकल्पांतर्गत विकासाच्या दिशेने वाटचाल करेल अशी अपेक्षा असलेले बेळगाव शहर सध्या मूलभूत सुविधांच्या अभावाने ग्रासले आहे. स्मार्ट सिटीच्या नावाखाली झालेली अर्धवट विकासकामे जनतेसाठी डोईजड ठरत आहेत.
विशेषतः शहरातील बसथांब्यांची दुरवस्था पाहता, या प्रकल्पासाठी वापरलेला निधी पाण्यात गेल्याचे स्पष्टपणे दिसून येत आहे. जिल्हाधिकारी कार्यालयासमोरचा बसथांबा भटक्या जनावरांनी काबीज केल्यामुळे माणसांना पावसात उभे राहावे लागत आहे, यामुळे नागरिकांतून नाराजी व्यक्त होत आहे.
शहरातील अनेक बसथांबे आणि रस्ते भटक्या जनावरांमुळे वाहतूक कोंडीचे मुख्य कारण बनले आहेत. जिल्हाधिकारी कार्यालयासारख्या महत्त्वाच्या ठिकाणीही जर ही परिस्थिती असेल, तर सामान्य नागरिकांच्या सोयीचा विचार कोण करणार, हा प्रश्न उपस्थित होतो. बसथांबे प्रवाशांच्या सोयीसाठी बांधले जातात, मात्र बेळगावात या थांब्यांवर माणसांपेक्षा जनावरांचाच वावर अधिक दिसतो. यामुळे नागरिकांना उन्हातान्हात किंवा पावसात रस्त्याच्या कडेला उभे राहून बसची वाट पाहावी लागते.
आता लवकरच शाळा सुरू होणार आहेत आणि बसमधून प्रवास करणाऱ्या विद्यार्थ्यांची संख्या लक्षणीय वाढेल. पावसाळी दिवसांत मान्सूनपूर्व पावसाने आतापासूनच जोरदार हजेरी लावली आहे.
अशा परिस्थितीत बसथांब्यांवर जनावरांचा वावर आणि त्यामुळे होणारी गैरसोय विद्यार्थ्यांसाठी धोकादायक ठरू शकते. पावसात उभे राहावे लागल्यास विद्यार्थ्यांना आरोग्याच्या समस्यांनाही सामोरे जावे लागू शकते. जर या गंभीर समस्यांकडे दुर्लक्ष केले गेले, तर नागरिकांना, विशेषतः विद्यार्थ्यांना, आवश्यक सोयीसुविधा कशा मिळणार, हा प्रश्न उपस्थित होत आहे.
स्मार्ट सिटी प्रकल्पांतर्गत शहरात अनेक विकासकामे हाती घेण्यात आली. परंतु, त्यातील बहुतांशी प्रकल्प अर्धवट स्थितीत आहेत किंवा त्यांचा वापरच होत नाहीये. शहराचे विद्रुपीकरण झाल्याचे चित्र आहे.
बसथांब्यांच्या बाबतीतही हेच घडले आहे. कोट्यवधी रुपये खर्चून विकसित केलेले बसथांबे आज दुर्लक्षित अवस्थेत आहेत आणि त्याचा फायदा जनावरांनाच जास्त होताना दिसत आहे. ही परिस्थिती स्मार्ट सिटीच्या नावाखाली झालेल्या कामांवर आणि निधीच्या वापरावरील प्रश्नचिन्ह निर्माण करणारी ठरत आहे.
या समस्येवर त्वरित तोडगा काढणे आवश्यक आहे. महानगरपालिकेने भटक्या जनावरांना पकडण्याची मोहीम तातडीने हाती घेऊन त्यांच्या मालकांवरही कठोर कारवाई करणे गरजेचे आहे. केवळ जनावरे पकडून उपयोग नाही, तर यावर कायमस्वरूपी उपाययोजना करणे अत्यावश्यक आहे. त्याचबरोबर, शहरातील बसथांब्यांची नियमित स्वच्छता आणि देखभाल करणेही महत्त्वाचे आहे.
नागरिकांना, विशेषतः विद्यार्थ्यांना, सुरक्षित आणि स्वच्छ ठिकाणी बसची वाट पाहता यावी यासाठी आवश्यक त्या उपाययोजना करणे हे महानगरपालिकेचे कर्तव्य आहे. बेळगाव खऱ्या अर्थाने स्मार्ट सिटी बनायचे असेल, तर अशा मूलभूत समस्यांवर लक्ष केंद्रित करून त्या त्वरित सोडवणे अत्यंत आवश्यक आहे.
