बेळगाव लाईव्ह : सौंदत्ती यल्लम्मा येथे येत्या १२ फेब्रुवारी रोजी भरत पौर्णिमेच्या निमित्ताने होणाऱ्या यात्रेच्या पार्श्वभूमीवर रेणुकादेवीच्या दर्शनासाठी जाणाऱ्या बसरीकट्टी येथील भाविकाचा दुर्दैवी मृत्यू झाला आहे.
याबाबत अधिक माहिती अशी कि, सौंदत्ती यल्लम्मा येथे दुचाकीवरून बसरीकट्टी येथील भैरव कृष्णा चौगुले हे जात होते. मुनवळ्ळी नजीक स्विफ्ट कारने सदर दुचाकीला जोराची धडक दिली त्यात दुचाकीवरून जाणारे भाविक गंभीररीत्या जखमी झाले होते. जखमींवर उपचार सुरु असताना बेळगाव मधील खाजगी रुग्णालयात भैरव कृष्णा चौगुले (वय ३०) यांचा मृत्यू झाला आहे.
मृत भैरव कृष्णा चौगुले यांच्या पश्चात आई, वडील, पत्नी, दोन मुली असून त्यांची पत्नी गर्भवती आहे. गुरुवारी सायंकाळी ५.३० च्या सुमारास हा अपघात घडला होता.
या अपघातातील आणखी एका व्यक्तीच्या पायाला गंभीर दुखापत झाली असून त्याच्यावर खाजगी रुग्णालयात उपचार सुरु आहेत.
